« افغانستان ته د کډوالو اخراج باید ودرول شي »
۱۴۰۳ آذر ۱۱, یکشنبه
د آلمان د ايالتي داخله وزيرانو تر کنفرانس مخکې په برلین کې د کډوالو شورا د دې غوښتنه وکړه چې د افغانستان، سوریې او ځینو نورو هېوادونو د کډوالو د ایستلو مخه دې ونیوله شي.
د دغې شورا د اعلامیې په یوه برخه کې ویل شوي چې « د طالبانو ترهګرې ملېشې» په افغانستان کې واکمنې دي او سوریه د پخوا په څېر په کورنۍ جګړه کې ښکېله ده. دې شورا ایران او سومالیا ته د اخراج د ځنډولو یادونه هم کړې ده.
وروسته له هغې چې طالبانو په ۲۰۲۱ کال کې په افغانستان کې واک تر لاسه کړ، د روان کال د اګست په پای کې افغانستان ته د کډوالو د ایستلو لومړی پړاو پیل شو. د آلمان فدرالي حکومت ویلي چې دغواخراج شویو کسانو بیلا بیل جرمونه کړي و.
د آلمان د کورنیو چارو فدرالي وزیرې نانسي فیزر په وار وار ټینګار کړی دی چې د اخراج لړۍ به نوره هم دوام وکړي او دا به هم ممکنه کړي چې سوریي ته بیرته مهاجر واستوي.
په برلین کې د کډوالو شورا د بشردوستانه داخلې پروګرامونو د لا زیاتیدو او ګړندي کیدو غوښتنه کړې.د آلمان د کورنیو چارو وزارت د جمعې په ورځ اعلان وکړ چې اوس مهال له خطر سره د مخ افغانانو د منلو لپاره کومه نوې ژمنه نه ده شوې.
د افغانانو د منلو لپاره د آلمان پروګرام د ۲۰۲۲ کال د اکتوبر په میاشت کې پیل شو او هره میاشت به شاوخوا ۱۰۰۰ کسان چې په افغانستان کې له جدي خطر سره مخامخ و آلمان ته لیږدول کیدل.د آلمان د حکومت د شمیرو پر بنسټ له هغه وخت راهیسې یوازې ۸۶۴ کسان د دغه پروګرام له لارې آلمان ته داخل شوي دي. ټاکل شوې ده چې د آلمان د فدرالي ايالتونو د کورنیو چارو وزیران له چهارشنبې تر جمعې پورې د مکلینبورګ فورپورمن ایالت په راینبرګ ښار کې غونډه وکړي.