Baraza la wawakilishi lakamilisha hoja za kumshtaki Trump

Wasimamizi wa mashtaka hayo kutoka Baraza la Wawakilishi wamefunga kesi yao baada ya siku mbili za hoja zilizohusisha maneno ya Trumpmwenyewe, na masaa kadhaa ya kuonyesha picha za video kutoka shambulio dhidi ya makao ya bunge na wafuasi wa Trump, ambao walikuwa wanataka kuzuwia zoezi la uhakiki wa ushindi wa mdemocrat Joe Biden katika uchaguzi wa Novemba 3.

Mawakili wa Trump wataanza utetezi wao leo Ijumaa, wakihoji kwamba rais huyo wa zamani hawezi kuwajibishwa binafsi kwa uvamizi wa bunge. Wamehoji pia kabla kwamba mashtaka hayo hayana msingi kikatiba kwa sababu Trump hivi sasa hayuko tena madarakani, inagwa hoja hiyo ilitupiliwa mbali na Seneti mapema wiki hii.

"Tunawaomba kwa heshima na taadhima mumtie hatiani rais Trump kwa makosa ambayo ana hatia kubwa kwayo," alisema mwakilishi wa chama cha Democratic Joe Neguse, mmoja wa wasimamizi tisa wa mashtaka kutoka baraza la wawakilishi.

Soma pia: Baraza la Seneti lapiga kura kuendelea na kesi ya Trump

"Kwa sababu msipofanya hivyo, iwapo tutajifanya kama vile hili halikutokea -- au mabaya zaidi, tukiliacha kupita bila kutolewa majibu-- nani anatasema halitotokea tena?"

Jamie Raskin, kiongozi wa timu ya timu ya mashtaka, aliwakumbusha maseneta 100 wanaokaa kama wazee wa baraza juu ya kiapo chao cha kutoa haki bila upendeleo.

Matumaini finyu ya Trump kutiwa hatiani

Mapema, rais Biden alisema ushahidi wa vidio dhidi ya mtangulizi wkae mwenye umri wa miaka 74 uliwasilishwa mbele ya Seneti unaweza kubadili baadhi ya wabunge. Lakini licha ya kile ambacho baadhi ya Warepublican wamekitaja kuwa kesi nzito ya mashtaka, Trump anabaki kuwa na ushawishi mkubwa ndani ya chama, hali inayofanya kuwa vigumu sana kumtia hatiani.

Ili hilo kufanyikaa itahitajika wingi wa theluthi mbili ya wanachama 100 wa baraza la seneti, hii ikimaanisha kuwa Warepublican 17 watahitajika kuungana na Wademocrat 50 wa baraza hilo. Machafuko hayo ya Januari 6 yaliripuka baada ya Trump kufanya mkutano mkubwa karibu na ikulu ya White House, akisisitiza isivyokweli kwamba aliporwa ushindi wake.

Soma pia: Trump akataa wito wa kutoa ushahidi bungeni

Baada ya kuagizwa na Trump kuandamana kuelekea bunge, ambako wabunge wakati huo walikuwa wanaidhinisha ushindi wa Biden, kundi la wafuasi hao wa Trump walivinja vizuwizi vya polisi, na kuanza kufanya uhairibifu mkubwa, katika machafuko yaliosababishwa vifo vya watu watano.

Chanzo:Mashirika