Уапсени родителите на осомничениот убиец во Мичиген
4 декември 2021
Неколку дена по нападот што 15-годишник го изврши во училиште во американската сојузна држава Мичиген, во кој беа убиени четворица ученици, денеска се уапсени родителите на напаѓачот. Џејмс и Џенифер Крамбли се уапсени во фабричка зграда во Детроит, соопшти полицијата. Апсењето минало без инциденти. Возило кое беше доведено во врска со брачната двојка беше лоцирано вчеравечер во Детроит. Џејмс и Џенифер Крамбли се уапсени нешто подоцна и би требало да бидат транспортирани во затворот во Оукленд Каунти.
Родителите се соочени со обвиненија за убиство без предумисла во четири случаи, соопшти обвинителката Карен Мекдоналд. Таткото го купил оружјетозаедно со синот четири дена пред нападот. Мајката на онлајн-платформи го опишувала полуавтоматскиот пиштол како „божиќен подарок“ за синот. Родителите по нападот во училиштето беа во бегство.
Со обвинението против Џејмс и Џенифер Крамбли треба „да се повикаат на одговорност оние кои придонесле за трагедијата и треба да се испрати порака до сопствениците на оружје дека имаат одговорност“, изјави обвинителката.
Напаѓачот во малото гратче Оксфорд, источно од Детроит, во вторникот уби четири деца на возраст помеѓу 14 и 17 години, а повреди седум лица. Тој не пружал отпор при апсењето. Обвинет е за четирикратно убиство и тероризам. На тинејџерот треба да му се суди според кривичниот закон за возрасни. Тој е соочен со доживотен затвор.