Скандалот со јајца има криминална позадина?

Она што се случувало во скандалот со јајца е „криминално, тоа е сосема јасно“, изјави министерот за земјоделство Кристијан Шмит за утринската програма на првиот канал на германската телевизија АРД. Тоа, вели министерот, мора да се казни. Трагите водат кон Белгија и Холандија, а каде инсектицидот Фипронил бил вмешан во процесот сѐ уште е предмет на истрага.

Шмит ги повтори обвинувањата на сметка на белгиските власти, кои рано дознале за токсините во јајцата. „Тоа не е во духот на системот на рано предупреудвање. Знаеле во јуни, а нас нѐ информираа на крајот на јули“, рече Шмит. Тој побара за темата да расправа Советот на министри на ЕУ.

Министерот соопшти дека во продавниците веќе не би требало да има затруени јајца. На прашањето дали такви јајца сѐ уште се продаваат, Шмит одговори: „Со најголема веројатност тоа може да се исклучи.“

Инсектицидот Фипронил прво беше откриен во јајца од Белгија и Холандија. Најмалку 10 милиони контаминирани јајца од Холандија биле доставени во Германија, соопшти Министерството за земјоделство. Дел од нив завршил во продавниците. Трговскиот ланец Алди ги повлече јајцата од продажба од сите свои продавници, а други супермаркети ја ограничија продажбата од безбедносни причини.

Од продажба се повлечени и јајца во Шведска и Швајцарија. Во меѓувреме скландалот со тоскични јајца се прошири и во Франција и Велика Бртитанија.