СДСМ се откажа од условите и ќе оди на избори
30 март 2011
Денеска (30.03.2011) значително се зголемија изгледите за одржување на предвремени парламентарни избори во Македонија. Претседателот на опозицискиот Социјалдемократски сојуз , Бранко Црвенковски објави дека неговата партија се откажува од сите услови кои ги постави за одржување на изборите во земјата.
Меѓу барањата што не беа усогласени меѓу власта и опозицијата беше донесувањето на закон за рамномерна распределба на буџетските средства за јавни кампањи и деблокирање на сметки на медиумите од „Перо Наков“ б.б., кое подоцна го преформулираа како барање УЈП да не изнесува нови побарувања до медиумите до одржувањето на изборите.
Бранко Црвенковски на денешната прес-конференција најави дека СДСМ ќе учествува на следните парламентарни избори но и дека партијата не се враќа во Собранието
„Донесете каков сакате изборен закон. Направете каков сакате избирачки список. Трошете од буџетот колку сакате за ваше рекламирање по медиуми. Само соопштете го денот на избори и ние сме тука! Вие со вашиот закон, со вашиот избирачки список, со вашите медиуми, со вашите 220 милиони евра за купување на гласови на едната страна и ние со народот на другата страна. И ќе ве победиме! Со силата на народот ќе ве победиме!“, изјави Црвенковски.
Автор: СН/макфакс/миа
Редактор: Симе Недевски