Watu kadhaa wajeruhiwa katika sherehe za carnival

Watu 30 wamejeruhiwa hapo jana ikiwa ni pamoja na watoto katika mji mdogo wa Volkmarsen magharibi mwa Ujerumani, baada ya raia wa Kijerumani aliyekuwa ndani ya gari kulivamia gwaride la watu waliokuwa wakisherehekea tamasha la kitamaduni la 'Karnival'.

"Alikuwa akiliendesha gari kwa kasi kuelekea kwenye umati wa watu. Hisia yangu ni kwamba alikuwa akiongeza kasi. Kulikuwa na sekunde chache za ukimya halafu kila mtu akaanza kupiga kelele," amesema Friedhelm Engelmann, mmoja wa wakazi walioshuhudia tukio hilo.

Waendesha mashtaka wa Ujerumani pamoja na polisi wamesema mshukiwa huyo, kijana mwenye umri wa miaka 29, amekamatwa kwa tuhuma za kujaribu kuua. Wameongeza kwamba sababu bado haijulikani, lakini tukio hilo linazingatiwa kuwa ni la makusudi huku uchunguzi ukiwa unaendelea.

"Hatufikiri kuwa hili lilikuwa ni shambulio la kigaidi. Lakini linaweza kuzingatiwa kama shambulio la makusudi. Bado hatujui sababu zake. Mahojiano ya hadi sasa hayatoshi kuweza kusema chochote kuhusu nia ya shambulio hili," ameeleza msemaji wa polisi wa jimbo la Hesse, Henning Hinn.

Wengi waliojeruhiwa ni watoto

Waziri wa ndani wa jimbo la Hesse, Peter Beuth, amesema thuluthi moja ya waliojeruhiwa ni watoto. Kati ya watu wanane hadi kumi miongoni mwa hao thelathini wamejeruhiwa vibaya sana.

Tukio hilo limetokea siku chache baada ya mtu mmoja kuwaua watu tisa kwa kuwapiga risasi kabla ya kumuua mama yake na yeye mwenyewe kujiua, katika moja ya mashambulio mabaya zaidi ya ubaguzi wa rangi kushuhudiwa Ujerumani tangu Vita vya vya Pili vya Dunia.

Soma zaidi:Ujerumani yakiri kitisho cha itikadi kali

Msemaji wa polisi na waendesha mashtaka wamekataa kutoa kauli yoyote juu ya taarifa za vyombo vya habari kwamba polisi imemkamata mshukiwa mwengine anaehusishwa na tukio hilo.

Mnamo mwaka 2016, raia mmoja wa Tunisia mwenye mafungamano na wanamgambo wenye misimamo mikali ya dini ya Kiislamu aliendesha gari na kuwagonga watu waliokuwa kwenye soko la Krismasi mjini Berlin, na kusababisha vifo vya watu 12. Baadae naye aliuliwa na maafisa wa polisi wa Italia baada ya kukimbia Ujerumani.

Vyanzo: (rtre,afpe)