Waasi wauwa 26 Baluchistan

Bomu hilo liliripuka siku ya Jumamosi (Novemba 9) kwenye eneo la abiria katika kituo kikuu cha treni kwenye mji mkuu wa jimbo hilo, Quetta.

"Wanajeshi 14 na raia 12 wameuawa", alisema msemaji wa Hospitali ya Sandeman mjini Quetta, Wasim Baig, aliyeongeza kuwa wanajeshi wengine 46 na raia 14 walijeruhiwa.

Mwandishi wa habari wa AFP aliripoti kuona vidimbwi vya damu na mabegi yaliyochanika kwenye eneo hilo, huku paa la jengo la abiria likiporomoshwa chini.

Licha ya mashambulizi ya mara kwa mara kwenye jimbo la Baluchistan, idadi ya waliouawa siku ya Jumamosi ilikuwa kubwa zaidi katika jimbo hilo linalopakana na Afghanistan na Iran na ambalo limekuwa likiwania kujitenga na Pakistan kwa miongo kadhaa. 

Soma zaidi: Watu 24 wameuwawa katika shambulio la bomu kwenye kituo cha treni, Pakistan

Kundi la wanamgambo wa Baloch Liberation Army (BLA), lilidai kuhusika na mripuko huo uliotokea majira ya 2:45 asubuhi, likisema kwamba mashambulizi hayo yalielekezwa kwa kikosi cha "jeshi la Pakistan katika kituo cha treni cha Quetta... baadaya wanajeshi hao kumaliza kozi kwenye Chuo cha Kijeshi."

Shirika la habari la Pakistan, APP, liliwanukuu maafisa wa reli wakisema mripuko huo ulitokea karibu na kibanda cha kukatia tiketi katika wakati ambapo treni mbili zilikuwa zimepangiwa kuondoka.

Waziri Mkuu Shehbaz Sharif aliapa kwamba washambuliaji "watakumbana na hatua kali", kwa mujibu wa taarifa iliyotolewa na ofisi yake.

Maafisa wa polisi kwenye kituo cha Quetta walisema walikuwa bado wanachunguza sababu hasa ya mripuko huo.

Mashambulizi ya kujitoa muhanga

"Tulipofika hapa, kwanza ilionekana kama kwamba mabmu yalikuwa yamefichwa ama kuachwa kwenye mizigo. Lakini sasa tunafikiria huenda alikuwa mshambuliaji wa kujitoa muhanga," Muhammad Baloc, afisa wa ngazi za juu wa polisi, aliwaambia waandishi wa habari.

Maafisa wa zimamoto, waokoaji na abiria walikuwa wakikaguwa mabegi yaliyotelekezwa kwenye kituo hicho cha treni, chini ya ulinzi mkali wa vikosi vya usalama.

Soma zaidi: Watu wanane wauawa katika shambulizi Pakistan

Kundi la BLA hufanya mashambulizi ya mara kwa mara dhidi ya vikosi vya usalama ama raia wa Pakistan kutoka majimbo mengine, hasa hasa Wapunjabi.

Wanamgambo hao wamewahi kuishambulia miradi ya nishati inayofadhiliwa na wageni, hasa kutoka China, inaowatuhumu kwa unyonyaji wa mkoa huo wenye utajiri mkubwa wa rasilimali na kuwatenga wenyeji wa jimbo hilo masikini kabisa ndani ya Pakistan.

Mnamo mwezi Agosti, BLA ilidai kuhusika na mashambulizi ya kupangwa ambapo washambuliaji kwenye maeneo mbalimbali waliwauwa watu 39, ikiwa idadi kubwa kabisa kuwahi kutokea kwa wakati mmoja.