1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
SiasaMashariki ya Kati

Viongozi watofautiana kuhusu waranti wa kukamatwa Netanyahu

22 Novemba 2024

Israel na washirika wake wameushutumu uamuzi wa Mahakama ya Kimataifa ya Jinai - ICC wa kutoa waranti wa kukamatwa Waziri Mkuu wa Israel Benjamin Netanyahu.

https://p.dw.com/p/4nIRf
Mahakama ya Kimataifa ya Uhalifu wa Jinai - ICC mjini The Hague
ICC imetoa waranti wa kukamatwa Netanyahu, Yoav Gallant na mkuu wa kijeshi wa Hamas Mohammed DeifPicha: Alex Gottschalk/DeFodi Images/picture alliance

ICC pia ilitoa waranti za kukamatwa waziri wa zamani wa ulinzi wa Israel Yoav Gallant na mkuu wa kijeshi wa Hamas Mohammed Deif. Zilitolewa kuhusiana na tuhuma za uhalifu dhidi ya ubinaadamu na uhalifu wa kivita katika vita vya Israel dhidi ya Hamas huko Gaza, vilivyochochewa na shambulizi la kundi hilo la wanamgambo wa Kipalestina la Oktoba 7, 2023 dhidi ya Israel.

Netanyahu ameutaja uamuzi wa ICC kuwa ni wa chuki dhidi ya Wayahudi. Marekani pia imeupinga uamuzi huo. Naye Mkuu wa sera za kigeni wa Umoja wa Ulaya Josep Borell amesema uamuzi huo wa ICC lazima uheshimiwe na kutekelezwa. Mamlaka ya Palestina, ambayo ni mpinzani wa Hamas imeukaribisha uamuzi huo ikisema unawakilisha matumaini na imani kwa sheria za kimataifa na taasisi zake.