Tanzania yaanza kuwapa raia umeme kwa mgao kufuatia ukame

Akizungumza jijini Dar es Salaam Mkurugenzi Mtendaji wa Shirika la Umeme Tanzania (Tanesco) Maharage Chande amesema kampuni hiyo inakabiliwa na upungufu wa kati ya megawati 300 na 350.

Umeme bado ni mashaka makubwa tu Tanzania

Chande ametaja ukame wa muda mrefu na matengenezo yanayoendelea katika baadhi ya vituo vya kufuwa umeme kuwa sababu kuu mbili ambazo zinasababisha upungufu katika uzalishaji umeme.

Juhudi za Tanzania kuongeza uwezo wa kuzalisha umeme

Tanzania inajaribu kuongeza uwezo wake wa kuzalisha umeme kwa kutumia maji, ikiwa ni pamoja na kuendelea na ujenzi wa mradi tata wa bwawa la Julius Nyerere katika Pori la Akiba la Selous, unaotarajiwa kuzalisha megawati 2,100 mara baada ya kuanza kutumika.

Kumekuwa na wasiwasi  mkubwa nchini Tanzania kutokana na mgawo huo wa umeme unaoathiri maeneo mengi. Japo mamlaka nchini humo zinasema mgawo huo umesababishwa na hali ya ukame, wakosoaji wa mambo wanainyoshea kidole serikali kwa kushindwa kuweka vipaumbele vyake ili kuondokana na adha hiyo inayojitokeza mara kwa mara.

Licha ya ahadi za mara kwa mara za serikali kulitafutia ufumbuzi wa kudumu suala hilo, lakini linaonekana kuwa donda ndugu kwa vile linajitokeza kila mara na safari hii maumivu yake yanaonekana kugusa watu wa sekta zote.

Viwango vya maji vimepungua katika mabwawa

Kiasi cha umeme kinachoelezwa kupungua safari hii kinatajwa kufikia megawati 300 hadi 350 kwa siku na wakati akitoa tathmini ya hali ya mgawo huo, mkurugenzi mkuu wa shirika la umeme Tanzania(Tanesco) Maharage Chande amesema kiwango cha maji katika maeneo kama Kihansi, Bwawa la Mungu na maeneo mengine kipo chini mno.

Kwa maana hiyo hali ya mgawo huo huenda ukaandeelea kuathiri wengi hadi mwishoni mwa mwezi wa Disemba ingawa shirika hilo linasema limeweka mipango kadhaa kurejesha uzalishaji wa umeme.

Shughuli nyingi za kibiashara zinakwama kutokana na mgawo huo na makundi ya watu wanaofanya shughuli ndogondogo kama vile  vinyozi na wasusi wa salooni, biashara za viwanywaji baridi na shughuli nyingine za hapa na pale ndizo zinazoenelana kuumia zaidi.

Kilio cha wafanyabiashara

Lakini wafanyabiashara wakubwa na wenye kuendesha viwanda ambavyo uzalishaji wake hutegemea umeme kwa asilimia 100, hawajaachwa nyuma kwenye kilio hicho wakisikitika kwa namna wanavyoanguka kiuzalisha.

Wakosoaji wa mambo wanasema mamlaka zinazohusika na nishati zinapaswa kubeba mzigo wa lawama kwa kushindwa kuleta ufumbuzi wa kudumu kuhusu kadhia hii.

Mgawo wa umeme unakuja siku chache wakati makali ya mgawo wa maji ukianza kupungua katika baadhi ya maeneo huku mgawo huo ukiwa umeleta adhari kubwa.