Obama akutana na Abbas na Netanyahu Washington

Rais wa Marekani Barack Obama amefanya mazungumzo na rais wa mamlaka ya ndani ya Wapalestina, Mahmoud Abbas na waziri mkuu wa Israel, Benjamin Netanyahu mjini Washington usiku wa kuamkia leo. Mkutano huo umefanyika kabla kuanza tena leo mazungumzo ya ana kwa ana kati ya pande hizo mbili katika kipindi cha karibu miaka miwili. Akizungumza na waandishi wa habari katika ikulu yake mjini Washington rais Obama amesema Marekani haitayumbishwa katika kuhakikisha usalama wa Israel.

Juhudi mpya za amani zimegubikwa na mauaji ya Waisraeli wanne na kundi la Hamas Jumanne usiku karibu na makaazi ya Wayahudi ya Kiryat Arba, katika eneo la Ukingo wa Magharibi. Kundi hilo limeapa kupinga juhudi za amani na kusema rais Abbas hana haki ya kufanya mashauriano kwa niaba ya Wapalestina.