NATO, EU na G7 zasimama pamoja kupinga uvamizi wa Urusi

Viongozi wa nchi wanachama wa muungano wa kijeshi wa NATO wamekutana mjini Brussels kwa ajili ya mkutano wa kilele usio wa kawaida kushughulikia hatua za kujibu uvamizi wa Urusi dhidi ya Ukraine.

Rais wa Marekani, Joe Biden amesisitiza msaada zaidi wa kijeshi kwa Ukraine, huku Uingereza ikijiandaa kuweka vikwazo vipya dhidi ya Urusi. NATO imesema itapeleka wanajeshi zaidi katika nchi wanachama upande wa Ulaya Mashariki.

Katibu mkuu wa NATO Jens Stoltenberg amesema baada ya mkutano wa kilele usio wa kawaida wa viongozi wa NATO kwamba jumuiya hiyo imeweka tayari ulinzi dhidi ya silaha za kemikali na za nyuklia kwa ajili ya kuzilinda nchi wanachama kutokana na uvamizi wa Urusi nchini Ukraine.

Stoltenberg amesema hatua hiyo ni miongoni mwa hatua za kuiunga mkono Ukraine na pia kujiwekea ulinzi binafsi wa NATO. Katibu huyo ameongezewa muda wa mwaka mmoja kuendelea kuhudumu kama katibu mkuu wa NATO. 

Wakati huo huo, kundi la viongozi wa nchi saba zilizoendelea kiviwanda G7 wametangaza hatua za kuzuia matumizi ya dhahabu ya Benki Kuu ya Urusi katika shughuli za malipo, huku Marekani ikitangaza awamu mpya ya vikwazo vinavyowalenga watu binafsi, na matajiri wapatao 400 wakiwemo wanachama wa bunge la Urusi, Duma.

Hapo awali, vikwazo dhidi ya matajiri wa Urusi, Benki Kuu ya nchi hiyo na Rais Vladimir Putin havikuathiri akiba ya dhahabu ya nchi hiyo, ambayo imehifadhiwa kwa miaka kadhaa.

Urusi inahodhi takriban dola bilioni 130 katika akiba ya dhahabu, na Benki ya Urusi ilitangaza mnamo Februari 28 kwamba itaanza tena ununuzi wa dhahabu kwenye soko la ndani la madini ya thamani.

Akihutubia mkutano wa kilele wa NATO wa mjini Brussels, kwa njia ya video rais wa Ukraine Volodymyr Zelenskiy amesema Ukraine inahitaji ndege za kivita, vifaru, silaha za kupambana na meli na ulinzi wa anga ulioboreshwa ili kuwazuia wanajeshi wa Urusi katika vita hivyo vilivyoingia katika mwezi wa pili tangu kuanza.

Baadi ya viongozi na wakuu wa nchi zenye nguvu duniani walikutana pembezoni mwa mkutano wa kilele wa NATO ambapo Rais Biden alikutana na Katibu Mkuu wa NATO Jens Stoltenberg huku Rais wa Ufaransa, Emmanuel Macron akikutana na mwenzake wa Uturuki, Recep Tayyip Erdogan.

Mataifa ya Magharibi yanatarajiwa kumuonya Rais Putin kwenye tamko lao la pamoja baada ya mikutano hiyo mitatu kwamba Urusi italipa gharama kubwa kutokana na kuivamia Ukraine.

Mikutano hiyo inafanyika katika mji mkuu wa kidiplomasia barani Ulaya, Brussels, Ubelgiji ambao ni mwenyeji wa mikutano hiyo ya dharura ya NATO, kundi la mataifa saba yaliyoendelea kiviwanda G7 na ule wa wanachama 27 wa nchi za Umoja wa Ulaya.

Vyanzo: AP/RTRE