Mshukiwa wa mlipuko wa gesi Nairobi apandishwa kizimbani

Derrick Kimathi, ambaye polisi wanasema alikodisha "kwa njia haramu" sehemu ya kuhifadhi mitungi ya gesi kulikotokea mlipuko huo, alifikishwa mahakamani akiwa amevaa kofia nyeusi na barakoa usoni.

Wakili wake ameeleza kuwa, Kimathi atashirikiana na polisi lakini amekanusha kuwa, mteja wake alikuwa anasimamia sehemu hiyo ya kuhifadhi mitungi ya gesi.

Watu sita walipoteza maisha na wengine 280 walijeruhiwa baada ya lori lililokuwa limebeba mitungi ya gesi kulipuka usiku wa kuamkia Ijumaa, na kusababisha moto mkubwa katika eneo la Embakasi, kusini mashariki mwa Nairobi.

Rais William Ruto amesema kuwa leseni zilitolewa kimakosa kwa wafanyibiashara wa kuuza gesi karibu na makaazi ya watu kwa sababu ya uzembe na ufisadi.