Moise Katumbi azuiwa kurejea Congo

Kiongozi huyo  wa  upinzani  alizuiwa  kurejea  nyumbani  ameahidi kupambana  ili  kufanyika  uchaguzi  halisi.

Moise  Katumbi , mfanyabiashara  tajiri  na  gavana  wa  zamani  wa jimbo  la  Katanga , alizuiliwa  kuingia  katika  jamhuri  ya Kidemokrasi  ya  Congo  na kushitakiwa  kwa  makosa  dhidi  ya usalama  wa  taifa, maafisa  wamesema. Katumbi  mwenye  umri  wa miaka  53, amekuwa  akiishi uhamishoni  alikomua binafsi  nchini Ubelgiji  tangu  Mei 2016 baada  ya  kutofautiana  na  rais  Joseph Kabila, ambaye  ameitawala DRC  kwa  miaka  17.

Alipanga  kurejea  nchini  humo  kwa  ndege  ya  binafsi  kutoka Johannesburg  kwenda  Lubumbashi, mji mkuu  wa  jimbo  la Katanga, kuwasilisha fomu zake  za  kuwania  urais  katika  uchaguzi uliocheleweshwa  kwa  muda  mrefu mwezi Desemba, hatua  ambayo itaongeza  mbinyo  kwa  rais  Kabila.

Lakini  meya  wa  mji  wa  Lubumbushi  alimkatalia  ruhusa  ya kuingia, wakati  ofisi  ya  mwendesha  mashitaka  imesema  Katumbi ameshitakiwa  kwa  "kuhatarisha  usalama  wa  ndani  ya  nje" na atakamatwa  iwapo  atarejea. Mwandishi  habari  wa  redio  ya Ufaransa  RFI  amesema  Katumbi  badala  yake  aliwasili  katika mpaka  wa  Zambia na  DRC  wa  Kasumbalesa.

Vidio  zilizowekwa  katika  mtandao  na  wasaidizi  wake  pamoja  na watu  wengine  zinamuonesha  akiwa katika  upande  wa  mpaka  wa Zambia, akisalimiana  na  mamia  ya  waungaji  wake  mkono  katika gari  yake.

"Serikali  inanizuwia  kutua na  inafunga  mpaka, uhalifu  wangu? Kutaka  kuingia  nchini  mwangu  na  kuwasilisha  fomu  za  kuomba urais," Katumbi  aliandika  katika  ukurasa  wa  Twitter.

"Kwa  kujaribu  kunizuwia, wanataka  kuwanyima  Wakongo  haki yao  ya  uchaguzi  halisi. Nitapambana," ameongeza.

Mashitaka dhidi ya  Katumbi

Katika  upande  wa mpaka  wa  Congo , majeshi  ya  usalama yamechukua  hatua  dhidi  ya  waandamanaji  ambao  walikuwa wakirusha  mawe  hewabi, polisi  ya  Congo  imesema , na kuongeza  kwamba  dereva  wa  lori  la  Tanzania  amejeruhiwa kidogo. Takriban  vituo  viwili  vya  polisi  vya  upekuzi  viliwekwa  ili kufanya  upekuzi  hadi  katika  uwanja  wa  ndege  wa  Lubumbashi jana  Ijumaa  na  barabara  kuu  ya  mji  huo  kwenda  Zambia ilifungwa kwa  kutumia  lori, mwandishi  habari  wa  shirika  la  habari la  afp alisema.

Katumbi  anatakabiliwa  na  kukamatwa  baada  ya  kuhukumiwa kifungo  cha  miaka  mitatu  jela  wakati  akiwa  hayupo  mahakamani mwezi  Juni  2016  katika  kesi  ya  madai ya  udanganyifu  wa  mali. Pia  anashutumiwa  kwa  kukodi  mamluki  na  kuwa  na  pasi  ya kusafiria  ya  italia, ambapo  sheria  za  Congo  haziruhusu mtu  kuwa na  uraia  pacha wa  mataifa  mawili. Anakana  madai  hayo  yote katika  kesi  hizo  mbili.

Hasimu  mwingine  wa  Kabila , mbabe  wa  zamani  wa  kivita na makamu  wa  zamani  wa  rais  Jean-Pierre  Bemba , mwenye  umri wa  miaka  55 , alirejea  nyumbani  wiki  hii. Amewasilisha  rasmi ombi  lake  la  kuwania  urais siku  ya  Alhamis.

DRC haijawahi  kufanya  mabadiliko  ya  amani  ya  uongozi  tangu ilipopata  uhuru  kutoka  Ubelgiji  mwaka  1960, na  baadhi  ya wataalamu  wanahofia  kwamba  uchaguzi  wa  Desemba  23 huenda ukazusha  mzozo  mwingine  utakaomwaga  damu.

Kabila  mwenye  umri  wa  miaka  47 , amekuwa  madarakani  tangu mwaka  2001, akiliongoza  taifa  hilo lenye  utajiri  mkubwa  wa madini  na  ambalo  linasifika  kwa  rushwa, kutokuwa  na  usawa  na machafuko.

Mwandishi: Sekione  Kitojo / afpe

Mhariri: Isacc Gamba