1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
Afrika

Manusura bado wamekwama baada ya jengo kuporomoka Tanzania

Iddi Ssessanga
17 Novemba 2024

Wafanyakazi wa uokoaji nchini Tanzania wameendelea kufukua kifusi cha jengo lililoporomoka kwa siku ya pili Jumapili, wakitumaini kuwaokoa watu walionusurika kutoka chini ya kifusi hicho. Watu 13 wamethibitishwa kufa.

https://p.dw.com/p/4n5mp
Dar es Salaam Tanzania| Ajali ya jengo Kariakoo
Wafanyakazi wa huduma ya kwanza wakimbiza moja ya watu waliookolewa akiwa haiPicha: Eric Boniphace/DW

Jengo hilo lenye ghorofa nne lilianguka takriban saa 3:00 asubuhi (saa 12:00 GMT) Jumamosi katika soko lenye shughuli nyingi la Kariakoo katikati ya mji mkuu wa kibiashara, Dar es Salaam.

Watu 13 wamethibitishwa kufariki kutokana na kuporomoka kwa janga hilo, kikosi cha zima moto kilisema. Watu wasiopungua 84 walikuwa wameokolewa wakiwa hai kutoka kwenye eneo la tukio.

Dar es Salaam Tanzania| Ajali ya jengo Kariakoo.
Waokoaji wakimpa huduma ya kwanza manusura alietolewa kwenye kifusi cha jengo hilo.Picha: Yakub Talib/DW

Mkuu wa mkoa wa Dar es Salaam, Albert Chalamila, alisema Jumapili kuwa bado kuna watu zaidi waliokwama kwenye sakafu ya chini ya jengo lililoporomoka, bila kutaja idadi yao.

"Tunawasiliana... na tayari tumewapa oksijeni na maji," alisema. "Wako salama na tunaamini wataokolewa wakiwa hai na salama."

Rais wa Tanzania Samia Suluhu Hassan amezungumza Jumapili na vyombo vya Habari akiwa Brazil alikokwenda ziarani kikazi.

"Hadi sasa hatujajua sababu za kuanguka kwa jengo Hilo kwa sababh kipaumbele chetu kilikuwa ni kuwaokoa walionaswa katika jengo hilo" amesema Rais,

Juhudi za uokozi zakwaa kisiki

Mkuu wa kikosi cha zima moto, John Masunga, alisema juhudi za kutafuta na kuokoa zimekwamishwa na kuta nyingi zilizokuwa sehemu ya jengo hilo.

Baada ya sakafu za jengo hilo kuporomoka kwa kasi hadi zikaunda mlima wa vifusi, mamia ya watoa huduma ya kwanza walitumia nyundo na mikono yao kuvunja mawe kwa saa kadhaa. Baadaye, kreni na vifaa vingine vizito vya kuinua vililetwa kusaidia.

Haijabainika wazi ni kwa nini jengo hilo la biashara liliporomoka, lakini mashuhuda waliviambia vyombo vya habari vya ndani kuwa ujenzi wa kuongeza nafasi ya biashara chini ya ardhi ulianza Ijumaa.

Dar es Salaam Tanzania | Ajali ya jengo Karikakoo
Waziri Mkuu wa Tanzania Majaliwa Kassima Majaliwa akihutubia baada ya kutembelea eneo la tukio.Picha: Eric Boniphace/DW

Tukio hilo limeibua tena ukosoaji juu ya ujenzi usiodhibitiwa katika jiji hilo la Bahari ya Hindi lenye wakazi zaidi ya milioni tano.

Moja ya miji inayokua kwa kasi zaidi duniani, Dar es Salaam imeshuhudia ongezeko la biashara ya nyumba, huku majengo yakijengwa kwa kasi bila kujali sana kanuni za ujenzi.

Mwaka 2013, jengo lenye ghorofa 16 lilianguka jijini Dar es Salaam, na kusababisha vifo vya watu 34.

Florence Majani amechangia Ripoti hii kutoka Dar es Salaam