Harris akubali kushindwa, ampongeza Donald Trump

Kwanza, kama ilivyo kwa utamaduni uliozoeleka kwenye mataifa ya kidemokrasia, Bibi Harris alimpigia simu Trump kukubali kushindwa na kumpongeza rais huyo wa zamani wa Marekani kwa ushindi aloupata utakaomrejesha ikulu ya White House kwa miaka mingine minne.

Kwenye hotuba yake ya kukubali kushindwa, Harris amewarai Wamarekani "kutokata tamaa" akiwataka waendelee "kupambana".

"Ingawa ninakubali kushindwa kwenye uchaguzi huu, (lakini) sikubali kuitelekeza shauku ya kupambana iyoitia nguvu kampeni (yangu) alisema Harris katika sehemu ya hotuba yake aloitoa mbele ya majengo ya Chuo Kikuu cha Howard.

Mwanasiasa huyo ambaye iwapo angeshinda angekuwa mwanamke wa kwanza kuchaguliwa kuwa rais wa Marekani, amesema yeye na rais Joe Biden watafanya kila wawezalo kuhakikisha ubadilishanaji madaraka kwenda kwa Trump unafanyika kwa njia ya amani.

Ahadi hiyo imeonesha utofauti mkubwa na kile kilichotokea miaka minne iliyopita, pale Trump alipokataa kukubali kushindwa uchaguzi na Joe Biden, na kuzusha kizaazaa kilichosababisha wafuasi wake kuvamia majengo ya bunge mjini Washington.

Trump - mgombea mwenye makando kando aliyeshinda urais kwa awamu nyingine 

Donald J. Trump ndiye rais mpya wa Marekani, akishinda kura za kutosha za wajumbe maalum wa majimbo (270 zinahitajika ili kushinda) kujitangazia ushindi wa uchaguzi wa 2024. Alishinda majimbo muhimu kama Pennsylvania, Georgia, North Carolina, na Wisconsin. Awali, alikuwa rais kuanzia mwaka 2017 hadi 2021.

Wafuasi wanamchukulia rais huyo wa Republican kama mwokozi na shujaa, aliyekuwa tayari kutetea maadili yao dhidi ya waliberali nchini Marekani. Wakosoaji wanasema ni mhalifu aliyeshtakiwa, na walifuatilia kampeni kwa mshangao na kueleza kushtushwa na siasa zake kali, mienendo isiyo ya kiserikali, na matumizi yaliopindukia ya mitandao ya kijamii ndani na nje ya ofisi.

Katika kampeni za uchaguzi wa 2024, Trump alitoa kauli kwamba wahamiaji wa Haiti huko Springfield, Ohio, walikuwa wakiiba paka na mbwa wa majirani ili kuwala, madai ambayo yalithibitishwa kuwa ya uwongo.

Ingawa inachokingoja Marekani na dunia nzima wakati wa muhula wa pili wa Trump hakitabiriki, kuangalia nyuma kwenye muhula wake wa kwanza kunaweza kutoa maarifa fulani kuhusu kitakachokuja.

Uchaguzi 'ulioporwa', uvamizi wa Capitol na mashtaka ya uhalifu dhidi ya Trump

Wafuasi wa Trump wamebaki watiifu kwake. Wakati Trump alipokataa kukubali kwamba alishindwa katika uchaguzi wa rais wa 2020 dhidi ya Joe Biden na kudai kuwa aliporwa ushindi wake, idadi kubwa ya wahafidhina walimwamini.

Uchungzu mkubwa ulithibitisha kuwa madai hayo si ya kweli. Hata hivyo, Trump alishikilia hadithi kwamba Wademocrat walifanya udanganyifu katika uchaguzi licha ya mahakama zote ambazo madai kama hayo yalitolewa kutupilia mbali tuhuma hizo.

Mnamo Januari 6, 2021, kundi la wafuasi wa siasa kali za mrengo wa kulia na wafuasi wa Trump walivamia Jengo la Capitol linalohifadhi bunge la Marekani mjini Washington, DC, katika jaribio la kuzuia uthibitisho rasmi wa ushindi wa Biden.

Mapema siku hiyo, Trump alitoa hotuba mbele ya maelfu ya wafuasi ambapo alirudia madai yake ya uwongo na kusema, "Kama hamtapigana kama jehanamu, hamtakuwa na nchi tena." Kauli hii pamoja na uongo wake wa kuendelea kuhusu udanganyifu wa uchaguzi vilitazamwa na waangalizi kama vichocheo kwa umati wenye ghasia kujiandaa kufanya vitendo.

Soma pia: Viongozi wa dunia wamimina pongezi kwa Trump

Mnamo Januari 13, 2021, wiki moja kabla ya kumalizika kwa kipindi chake cha kwanza, Baraza la Wawakilishi lilipiga kura kumwondoa Trump madarakani kwa kosa la kuchochea uasi.

Wawakilishi kumi wa Republican walipiga kura kuunga mkono hatua hiyo, zikiwa ndiyo kura nyingi zaidi za kumuondoa rais kupigwa na wawakilishi kutoka chama chake na mara ya kwanza kwa rais kupigiwa kura ya kumuondoa madarakani kwa zaidi ya mara moja.

Baraza la Seneti likamuondolea mashtaka mwezi uliofuata, lakini mnamo mwaka 2023, Trump alishitakiwa kwa makosa manne yanayohusiana na kukataa kukubali matokeo ya uchaguzi wa 2020.

Wafuasi wanathamini msimamo "Marekani Kwanza"

Zaidi ya yote, wapiga kura wa Trump wanajali kuhusu ahadi yake ya kuiweka "Amerika mbele." Katika hali hii, Trump amekuwa akiikosoa NATO, akajiondoa katika mashirika ya kimataifa kama Shirika la Afya Duniani, WHO, na kuachana na Mkataba wa Paris kuhusu Mabadiliko ya Tabianchi.

Chini ya Rais Biden, Marekani ilijiunga tena na taasisi  hizo, lakini Trump anapanga kujiondoa tena. Mtazamo wake wa upande mmoja uliwakasirisha washirika wake wa Ulaya mara ya mwisho alipokuwa katika Ikulu ya White House, lakini uliwafurahisha wahafidhina wengi wa Marekani.

Wafuasi wa Trump pia wamekaribisha ahadi yake kuwapunguzia kodi matajiri.

Msingi wa biashara na burudani, siyo siasa 

Rais huyo wa 47 wa Marekani alizaliwa tarehe 14 Juni, 1946, katika eneo la Queens mjini New York. Babu yake kwa upande wa baba alihamia Marekani mwishoni mwa karne ya 19 kutoka mji wa Kallstadt nchini Ujerumani, katika eneo linalojulikana leo kama Rhineland-Palatinate.

Donald Trump alihudhuria Shule ya Biashara ya Wharton, ambayo ni maarufu mjini Philadelphia, akihitimu kwa Shahada ya Sayansi katika Uchumi mwaka 1968.

Wakati wa miaka ya 1970 na 1980, aliendelea kukuza biashara ya nyumba ya familia yake, inayojulikana kama Shirika la Trump, akitengeneza miradi maarufu kama Trump Tower  ulioko katikati mwa Manhattan, ambapo pia aliishi kabla ya kuhamia Florida. Katika miaka hiyo, shirika lake lilifanya kazi na hoteli nyingi, kasino, na viwanja vya gofu, vingi vya ambazo hatimaye vilifilisika.

Soma pia: Trump arejea Ikulu ya White House kwa ushindi wa kushangaza

Trump pia alijijengea jina kama mtangazaji wa kipindi cha televisheni cha "The Apprentice" Kilichozinduliwa mwaka 2004, ambapo washiriki walikuwa wanashindania mkataba wa mwaka mmoja katika moja ya biashara za Trump. Baada ya kila raundi, Trump alikuwa akimwondoa mshiriki mmoja kwa kutumia kauli mbiu yake: "Umefukuzwa."

'Habari za uongo' na sera kali za uhamiaji
 

Wakati wa urais wa Trump, serikali yake ilikuwa na uhusiano mgumu na vyombo vya habari na historia ya kudai habari za uwongo na zinazopotosha. Trump mara nyingi alipinga ukweli ambao haumfurahishi kama "habari za uongo," akiwashawishi wafuasi wake wengi kwamba vyombo vya habari vinavyokosoa vinaeneza uongo ili kuharibu sifa yake.

Wakati wa muhula wake wa kwanza, Trump alitekeleza sera kali za uhamiaji na mara kwa mara alitoa matamshi ya kibaguzi. Kabla ya uchaguzi wa rais wa 2016, Trump aliwaita wahamiaji wa Mexico "wabakaji" na "wahalifu." Baadaye aliahidi kujenga ukuta kwenye mpaka wa Marekani-Mexico — na kuifanya Mexico ilipe gharama, jambo ambalo halikufanyika. Mwisho wa muhula wa kwanza wa Trump mwaka 2021, kilomita 732 kwenye mpaka wa kilomita 3,145 zilikuwa zimejengwa, na kuwagharimu wapigakura wa Marekani takriban dola bilioni 16 wakati huo.

Msimamo mkali wa Trump juu ya uhamiaji ulikuwa na matokeo makubwa. Wahamiaji kutoka Amerika ya Kusini walikwama kwenye mpaka wa Marekani, huku watoto wakitenganishwa na wazazi wao. Picha za watoto wadogo wakiwa wamefungwa kwenye seli za gereza zilichochea hasira nyumbani na nje ya nchi. Serikali ya Trump, wakati huo huo, ilisisitiza kuwa hatua hizo zilihitajika kupambana na wimbi la wahamiaji wasiokuwa na nyaraka, ikisisitiza kwamba wale waliokuwa wakishikiliwa kwenye vituo vya kizuizini vya Marekani walitunzwa vizuri.

Mchakato wa kwanza wa kuondolewa madarakani na virusi vya korona

Mnamo Desemba 18, 2019, mchakato wa kumwondoa Trump ulizinduliwa kwa mara ya kwanza, na kumfanya kuwa rais wa tatu katika historia ya Marekani kukutana na kesi kama hiyo. Kesi ya kumwondoa ililenga madai kwamba Trump alikuwa akizuia msaada wa kijeshi kwa Ukraine ili kuilazimisha Kyiv kutoa msaada wa kumsaidia kuchaguliwa tena mwaka 2020 kupitia uchunguzi dhidi ya Joe na Hunter Biden.

Rais huyo wakati huo, kwa upande mwingine, alikanusha tuhuma zote. Baraza la Wawakilishi lilipitisha makala mawili ya kumwondoa Trump: matumizi mabaya ya madaraka na kuzuia shughuli za Congress. Hata hivyo, mashtaka dhidi yake yalifutwa na Baraza la Seneti lililokuwa linadhibitiwa na chama chake Republican.

Soma pia: Marekani yaamua: Chaguo ni kati ya Trump na Harris

Janga la virusi vya korona pia liliacha alama katika urais wa Trump. Kiwango cha vifo kutokana na UVIKO-19 kilikuwa juu sana Marekani ikilinganishwa na nchi nyingine tajiri.

Trump alidharau uzito wa hali hiyo na kutoa kipaumbele kwa kurejesha hali ya kawaida na uzalishaji wa kiuchumi badala ya kusikiliza ushauri wa wataalamu wa matibabu na wanasayansi.

Wakosoaji wanasema mwenendo wake ulichangia vifo vya maelfu ya Wamarekani. Katika mahojiano ya Agosti 2020, Trump alikiri kwamba watu walikuwa wakifa — akisema "ndivyo ilivyo."

Ndoa tatu, watoto watano

Mnamo 2005, Trump alifunga ndoa na Melania Knavs, mwanamitindo wa zamani wa Slovenia. Wanandoa hao wana mtoto wa kiume, Barron Trump. Kabla ya kumuoa Melania, Trump alimuoa mwigizaji Marla Maples. Alimlea binti yao, Tiffany, peke yake huko California.

Ndoa ya kwanza ya Trump, kati ya 1977 na 1990 na Ivana Zelnickova, ilizaa watoto watatu: Donald Jr., Ivanka na Eric.

Katika Mkutano wa Kitaifa wa Republican wa mwaka 2024, Trump, kinyume na mashambulizi yake ya awali dhidi ya wale walio upande wa kiliberali wa wigo wa kisiasa, alisisitiza ujumbe wa umoja.

"Kama Wamarekani, tumefungwa pamoja na hatima moja na mustakabali wa pamoja," alisema Trump katika hotuba yake. "Tunainuka pamoja au tunasambaratika. Nawania kuwa rais wa Wamarekani wote."

Juhudi zake zilikuwa za mafanikio. Kilichobaki ni kuona iwapo utawala wake utafanya juhudi za kweli kuiunganisha Marekani ambayo imegawanyika sana.