1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
SiasaKimataifa

Assange azungumza hadharani kwa mara ya kwanza

Saumu Njama
1 Oktoba 2024

Muasisi wa mtandao wa kufichua siri za serikali wa Wikileaks Julian Assange amezungumza hadharani kwa mara ya kwanza mbele ya Baraza la Umoja wa Ulaya la haki za binadamu.

https://p.dw.com/p/4lHeG
Ufaransa, Strasbourg | Julian Assange katika Kamati ya Haki za Kibinadamu ya Baraza la Ulaya
Julian Assange akizungumza katika Kamati ya Haki za Binadamu ya Baraza la Ulaya - muasisis wa WikiLeaks Julian Assange, karibu na mkewe Stella Assange, wakihudhuria kikao cha bunge katika Baraza la Ulaya mjini Strasbourg, mashariki mwa Ufaransa.Picha: Frederick Florin/AFP/Getty Images

Assange amesema aliachiwa huru baada ya miaka mingi kifungoni pale alipokiri makosa ya kuwa  "mwandishi wa habari", katika hotuba yake amesisitiza na kuonya kwamba uhuru wa kujieleza sasa uko hatarini kutumbukia gizani.

Akizungumza mbele Baraza la haki la Ulaya, lenye makao yake makuu mjini Strasbourg, katika maoni yake ya kwanza ya umma tangu kuachiliwa kwake Assange amesema hayuko huru leo ​​kwa sababu mfumo ulifanya kazi, lakini yuko huru leo ​​baada ya kukaa kifungoni kwa miaka mingi kwa sababu alikiri kosa la kuwa mwaandishi wa habari.

Soma pia: Assange arejea nchini mwake baada ya kuachiliwa huru

Bunge la Baraza la Ulaya (PACE) lilikuwa limetoa ripoti ikielezea kusikitishwa na jinsi Assange alivyoshughulikiwa akiwa kifungoni, likisema kuwa ilikuwa na "athari za kutisha kwa haki za binadamu".

Alitumia muda mwingi wa miaka 14 iliyopita aidha akiwa amejifungia katika ubalozi wa Ecuador mjini London ili kuepuka kukamatwa, au kufungwa katika Gereza la Belmarsh.

Uhuru wa kujieleza

Straßbourg | Julian Assange
Julian Assange anaonekana kwenye skrini alipokuwa akizungumza wakati wa akizungumzia kukamatwa kwake na kuhukumiwa.Picha: Stephane Mahe/REUTERS

Na mwezi Juni aliachiliwa chini ya makubaliano ya rufaa, baada ya kutumikia kifungo kwa hatia ya kuchapisha mamia ya maelfu ya nyaraka za siri za serikali ya Marekani.

"Hatimaye nilichagua uhuru badala ya haki isiyotekelezeka baada ya kuzuiliwa kwa miaka na kukabiliwa na kifungo cha miaka 175."

"Haki kwangu sasa imezuiwa kwani serikali ya Marekani ilisisitiza kuandika katika makubaliano yake ya maombi kwamba siwezi kufungua kesi katika Mahakama ya Ulaya ya Haki za Kibinadamu au hata ombi la Sheria ya Uhuru wa Habari juu ya kile ilichonifanyia kutokana na ombi la uhamisho sababu nilikiri kosa la uandishi wa habari."

"Natumai ushuhuda wangu leo ​​unaweza kutumika kuangazia udhaifu wa ulinzi uliopo na kuwasaidia wale ambao kesi zao hazionekani sana lakini ambao wako katika hatari sawa."

Nini hatma yake?

Julian Assange
Picha: DW

Hata hivyo kesi ya Assange inasalia na utata mkubwa. Wafuasi wanamsifu kama bingwa wa uhuru wa kujieleza na kusema aliteswa na mamlaka na kufungwa jela isivyo haki. Wapinzani wanamwona kama mwanablogu mzembe ambaye uchapishaji wake usiozingatia hati nyeti uliweka maisha ya watu katika hatari na kuhatarisha usalama wa Marekani.

Kwa sasa Assange bado anaendelea na juhudi za kupata msamaha wa rais wa Marekani kwa kuhukumiwa kwake chini ya Sheria ya Ujasusi.

Rais wa Marekani Joe Biden, ambaye huenda akatoa msamaha kabla ya kuondoka madarakani Januari mwaka ujao, amewahi kumtaja mwanablogu huyo kama "gaidi".