Sistemi dygjuhësh: gjermanisht - shqip

Para 4 viteve ishin vetëm 60 nxënës, por interesimi për të ndjekur mësimet këtu ka ardhur në rritje dhe tashmë sistemi është i konsoliduar. Pjesa më e madhe e nxënësve vijnë nga tre shkollat 9 vjeçare të qytetit, “Fan Noli”, “De Rada” dhe “Avni Rustemi”. Mësuesit e gjuhës gjermane në këto shkolla janë të kualifikuar në metodat e mësidhënies, duke krijuar një vijimësi nga sistemi 9 vjeçar në atë të mesëm, pasi nxënësit janë të familjarizuar me programin. Megjithatë tek “Sami Frashëri” vijnë dhe nxënës të cilët nuk kanë qenë në 3 shkollat 9 vjeçare partnere, por nga të tjera.

“Kushti është që ata duhet të jenë të pajisur me një çertifikatë të caktuar për nivelin e njohurive, të kenë rezultatet të mira në lëndën e matematikës dhe të kalojnë një test pranimi tek “Sami Frashëri”. Sepse duam që të sigurojmë një nivel pak a shumë të njëjtë në klasat tona” – shpjegon për DW Herbert Mühlfeit, drejtues i departamentit dygjuhësh.

Përgatitje për të ndjekur studimet në Gjermani

Nxënësit që janë në këtë department kur mbarojnë maturën mund të ndjekin shkollat e larta ose universitetet gjermane pa pasur nevojë për ndonje periudhë preparatore, siç mund të bëjnë studentët e tjetër.

Ifijemia Petroilu, nxënëse në klasën e 11 e ka nisur mësimin e gjuhës gjermanë që para 6 viteve. Ajo planifikon të studjojë në një universitet në Gjermani, por degën nuk e ka precizuar akoma. Kurse Enea Gojka e ka përcaktuar degën, për teknologji informacioni.”Këtu ka nivel të lartë mësimdhënie dhe kërkesë llogarie, kjo na jep siguri se do t'i përballojmë me sukses dhe studimet në Gjermani".

Lea Llupa është shumë e apasionuar pas matematikës, fizikës e biologjisë. “Në njërën prej këtyre fushave synoj që të thellojë njohuritë gjatë studimeve universitare në Austri ose Gjermani". Flavio Karaj ka ndjekur para se të vinte në gjimnazim “Sami Frashëri” kurse intensive në Qëndrën e Gjermanishtes në Tiranë. “Jam duke pritur me padurim një qëndrim 10 ditor në Gjermani, në familjen e një bashkëmoshatarit tim, i cili do të vijë në Tiranë, po 10 ditë”. Edhe Blerta Muço do të qëndrojë në një familje gjermane në Shtutgart. “Pres që ti përjetoj ato dhjetë ditë si një gjermane, për të zbuluar sa më shumë nga jeta dhe aktivitetet në këtë vend shumë të rëndësishëm të Bashkimit Europian dhe në mbarë botën”.

Trupa pedagogjike e kualifikuar

“Mesuesit janë të trajnuar për metodat e mësimdhënies në Gjermani dhe Shqipëri dhe aplikimin e metodave bashkëkohore. Tre janë mësues nga Gjermania, ndërkohë që një tjetër vjen për një periudhe 4 mujore duke realizuar një projekt në një fushë të caktuar“, thotë Mühlfeit.

Nëpërmjet komunikimit me rrjetet sociale ish maturantë që kanë përfunduar sistemin dygjuhësh në gjimnazin "Sami Frashëri" dhe që aktualisht janë në Gjermani tregojnë eksperiencat e tyre në akomodim, në zgjedhjen e degës, raportet me studentët e tjerë, një përshkrim mbi përvojat e tyre në periudhën studentore.

Projekti për mësimin dygjuhësh në gjimanzin “Sami Frashëri” është pjesë e iniciativës së ish-ministrit të jashtëm gjerman, Frank Valter Stajnmajer që njihet si "Shkollat-partnere të së ardhmes". Iniciativa synon krijimin e një rrjeti mbarëbotëror prej të paktën 1 mijë shkollash partnere me objektivin e konsolidimit të gjuhës gjermane si gjuhë e huaj, ndërtimin e lidhjeve vitale me Gjermaninë dhe shkollat, nxitjen e shkëmbimit të hapur të ideve dhe bashkëpunimit mes mësuesve e nxënësve.