Studim i OECD-së mbi situatën e imigrantëve në tregun gjerman të punës

Në Berlin të premten u paraqit një studim i Organizatës për Bashkëpunim Ekonomik dhe Zhvillim (OECD) mbi intregrimin në tregun e punës të imigrantëve në Gjermani. Rezultatet tregojnë se është shumë e nevojshme të merren masa për të përmirësuar situatën e këtyre njerëzve. Të prekur janë në rradhë të parë imigrantët e brezit të dytë dhe të tretë.

Fati i keq i të qënit i papunë prek veçanërisht shpesh të huajt që jetojnë në Gjermani. Ndërkohë që gjatë vitit të kaluar 11,5% e popullsisë së aftë për punë në Gjermani kërkonin një vend pune, ishin të papunë rreth 25% e të huajve. Kjo situatë veçanërisht në kohët kur ekonomia ndodhet në gjendje të vështirë nuk ka gjasa të ndryshojë shpejt edhe për faktin se një në pesë fëmijë të huaj nuk arrin të përfundojë shkollën. Për njerëz me kualifikim të ulët situata në tregun e punës është e errët.

Këtë vlerësim jep edhe Maria Bëmer e ngarkuara e kancelares gjermane Angela Merkel për çështjet e migracionit. Kushti më i rëndësishëm për një integrim të suksesshëm është mësimi i gjuhës qysh në kopësht thotë kristiandemokratja Bëmer njëkohësisht specialiste në çështjet e arsimit: "Nëse ata (pra të huajt) nuk janë në gjendje të zotërojnë gjuhën gjermane dhe të ndjekin mësimin qysh ditën e parë të shkollës është humbur shumë dhe ato dije ndoshta nuk mund të zëvendësohen më kurrë."

Në studimin e OECD-së mbi integrimin ka shumë fakte që flasin për mangësi në sistemin gjerman. Drejtuesi i studimit Tomas Libig përmend ndër të tjera aksesin problematik në tregun e punës. Duke marrë si shembull Suedinë Libig tregon se si mund të përmirësohet situata: "Atje, pra në Suedi, kemi parë se trainimi sa më herët për tregun e punës dhe punësimin kanë pas shumë vitesh një ndikim shumë më të fortë në punësim se sa një trainim intensiv për gjuhën. Këtu duhet gjetur raporti i duhur! Ç'masë trainimi gjuhësor është eficient dhe në ç'masë punësimi i hershëm sjell rezultate të njëjta apo ndoshta edhe më të mira?"

Për t'i dhënë përgjigje këtyre pyetjeve është e nevojshme të rivlerësohen masat e deritanishme në drejtim të integrimit, thotë Libig. Por një gjë e tillë deri tani nuk ka ndodhur. Nëse kjo do të ishte bërë do të mund të gjykohej më mirë përse imigrantët meshkuj në Gjermani janë të integruar më mirë në tregun e punës se femrat. Përgjigjen e kësaj pyetje dëshiron ta njohë edhe e ngarkuara e qeverisë gjermane për çështjet e migracionit Maria Bëmer:"Pika e dobët duket qartë se është situata e grave që vijnë në vendin tonë. Shpesh ato kanë kualifikim shumë të ulët ose janë fare të pakualifikuara. Punësimi i tyre është shumë i ulët dhe unë dyshoj se shumë prej tyre i gjen në tregun e zi të punës."

Sekretari i shtetit në Ministrinë e Punës dhe Çështjeve sociale, Gerd Andres, hoqi një paralele me përleshjet që zgjatën disa javë rresht në vendbanimet me përqindje të lartë të huajsh në Francë: "Kush ka ndjekur lajmet dhe kush merr në konsideratë të rinjtë që thonë se nuk kanë asjë shans në shoqërinë perëndimorë sepse vijnë nga familje magrebine ose ata që mendojnë se kur vijnë nga lagje të caktuara s'kanë pse marrin mundimin të kërkojnë punë se nuk marrin kurrë gjë, e di se kështu mendojnë shpesh edhe të rinjtë nga familje të huaja në Gjermani, p.sh. nga ato turke. Ata nuk marrin mundimin të aplikojnë pasi janë të bindur se nuk u jepet asgjë."

Kjo është një tendencë kundër së cilës duhet vepruar me të gjitha mjetet tha sekretari i shtetit Andres në kuadër të prezantimit të studimit të OECD-së mbi integrimin në tregun e punës të imigrantëve. Fakti që Gjermania është pas ShBA vendi i OECD-së me përqindjen më të lartë të banorëve të lindur jashtë vendit, 12%, tregon se sa delikate është kjo temë.