Refugjatët në Maqedoni - gjendje e jashtëzakonshme në kufi

Nisur nga fluksi i jashtëzakonshëm i refugjatëve në Maqedoni, qeveria ka shpallur gjendje krize në kufirin jugor dhe atë verior. Ushtria do të kontrollojë vijën kufitare në zonat më problematike me qëllim që të pengojë futjen e emigrantëve në territorin e Maqedonisë, ndërsa do të formohet edhe një shtab emergjence, i cili do të menaxhojë krizën. Zëdhënësi i Ministrisë së Brendshme Ivo Kotevski thotë se vendimi i fundit i Qeverisë është marrë me qëllim të parandalimit të valës së shtuar të emigrantëve. "Shpallja e gjendjes së jashtëzakonshme ka për qëllim të parandalojë çfardo lloj problemesh për popullatën lokale respektivisht për banorët që jetojnë në rajonin e Gjevgjelisë, ku hynë numri më i madh i emigrantëve. Njëkohësisht kjo masë e qeverisë ka për qëllim edhe mundësimin e trajtimit më të përshtatshëm dhe më human të emigrantëve, të cilët tanimë kanë hyrë në territorin e shtetit”, është shprehur Ivo Kotevski, zëdhënës i policisë

Kotevski thotë se emigrantët jolegal, të cilët deri më tani kanë hyrë në Maqedoni, janë transportuar në mënyrë të organizuar nga Greqia. “Për fat të keq, kufiri jugor që njëkohësisht është edhe kufi i jashtëm i Evropës, asnjëherë nuk është kontrolluar dhe mbrojtur nga Greqia. Jo vetëm që janë lejuar dhe nuk janë ndaluar emigrantët ilegal, por jemi dëshmitarë, se në shumë raste ata janë transportuar në mënyrë të organizuar deri në kufi”, theksoi Kotevski.

Maqedonia nuk ka kapacitet të ofroj ndihmë për emigrantët

Maqedonia është korridor tranzit dhe është me rëndësi se si ne do të ballafaqohemi me këtë sfidë. Në periudhën e ardhëshme pritet që numri i emigrantëve pritet të arrijë edhe në tre apo katër mijë e më shumë, ka thënë kryeministri Nikolla Gruevski Gruevski.
“Emigrantëve duhet t'u jepet ndihmë që ata të kenë transport human përmes Maqedonisë, që do të thotë se duhet patjetër të kontrollohet hyrja e tyre dhe numri i njerëzve, që vijnë këtu nëmënyrë që të mund t'iu ofrohet ndihma e nevojshme në Maqedoni. Shteti nuk ka kapacitet të ofrojë ndihmë për një numër kaq të madh të emigrantëve”, ka thënë kryeministri Gruevski.

Mijëra emigrantë, kryesisht të rinj të moshave prej 20 deri 30 vjeç synojnë që përmes Maqedonisë të shkojnë në Serbi dhe më pas në vendet evropiano-perëndimore.Numri i madhëi emigrantëve ka bllokuar hekurudhën Selanik- Shkup, në pjesën e kufirit me Maqedoninë. Për shkak të kësaj situate, në territorin grek janë bllokuar një tren pasagjerësh dhe një tren mallrash. Policia maqedonase po pengon turmat e emigrantëve për të hyrë në territorin e Maqedonisë.

Organizatat humanitare në terren
Gjatë muajit gusht Maqedonia u përfshi nga valë të reja me numër më të madh të emigrantëve. Sipas Organizatës joqeveritare “Legis”numri i refugjatëve nga Siria, Afganistani dhe Pakistani që duan të arrijnë në Evropë përmes itinerarit ballkanik po rritet me një shpejtësi marramendëse me deri në 1500- 2000 emigrantë në ditë. Kampet e strehimit ende nuk janë gati dhe nuk ka as një strehim për gratë, fëmijët dhe personat në moshë të thyer, shprehet Mersiha Smailoviq nga Organizata “Legis”.

“Ajo që tani shohim është një pasqyrë dëshpëruese, pasi vijnë një numër i madh gra e fëmijë. Në stacionin në Gjevgjeli kushtet atmosferike janë gjithashtu të pafavorshme, gjatë këtyre ditëve kamot me shi dhe një numër i madh fëmijë e gra janë lagur dhe në këto kushte janë detyruar të flenë në rajonin e policisë.Gjendja është alarmante si për numrin e refugjatëve ashtu dhe për kushtet që kemi në Maqedoni”, shprehet Smailoviq.

“Po qëndroja në radhë për të marrë vërtetimin por kishte shumë njerëz, ishim më shumë se 700 vetë. Policia u mundua të organizojë rendin por kot dhe filloi të na godasë, të na rrahë. Kemi pritur 16 orë për të marrë dokumentet, qëndrova aty pasi nuk kisha tjetër zgjidhje”, deklaron një emigrant nga Siria.

“Nuk kemi ushqim, as ujë për të pirë prandaj jemi ndalur këtu. Isha 3 ditë e 3 netë në Gjevgjeli, pasi nuk arrija të marr vërtetimin nga policia, nuk mundesha të vij as me autobus, as me taksi, as me tren pasi ai stërmbushej ", thotë një tjetër emigrant nga Afganistani.

“Në kufirin e Maqedonisë ka shumë emigrantë, prandaj nuk mundeshim të marrim dokumentin. Pritëm 3 ditë por më kot. Kemi një vërtetim grek por jo edhe një vërtetim të Maqedonisë”, thotë emigranti nga Afganistani.

Sipas të dhënave të Ministrisë së Punëve të Brendshme të Maqedonisë, numri më i madh i migrantëve është nga Siria, rreth 20 mijë të evidentuar, por shifra besohet të jetë shumë e madhe për shkak se shumë prej tyre ilegalisht hyjnë në Maqedoni, prej nga sërish në mënyrë ilegale kalojnë në Serbi për të vazhduar rrugën drejt vendeve të BE-së.