Reforma

Filozofi dhe eksperti gjerman për etikën Thomas Pogge njihet në gjithë botën për librin e tij "World Poverty and Human Right". Ai gjithashtu avokon për kujdes më të mirë mjekësor për pacientët me HIV dhe ka përpiluar disa propozime për reforma, të cilat do të sigurojnë një nxitje për kërkime për mjekim e duhur.

Bota sot gjendet përpara shumë problemesh serioze "dhe për t'i zgjidhur këto probleme duhet që edhe vendet më të pasura të jenë të gatshme për kompromis. Vendet e pasura thonë se ne kemi kapur një pozicion shumë të privilegjuar, ne na përket 80 për qind e prodhimit botëror dhe kjo duhet të mbetet kështu. Prandaj këto vende e shohin zgjidhjen e problemeve mjedisore në atë që ekonomia kineze duhet të rritet me më pak shpejtësi, ose që ekonomia indiane të rritet më ngadalë."

Në intervistë me DW Thomas Pogge thotë se sipas tij përgjigja, që vjen nga vendet e varfra është mjaft bindëse: "Për një kohë të gjatë juve ju kanë shkuar punët mirë dhe tani në qoftë se ka nevojë për të shtrënguar rripin, këtë duhet ta bëjnë kryesisht vendet e pasura." Sipas tij për të arritur një gjë të tillë duhet të ketë patjetër rregulla, por edhe të ekzistojë bindja se kjo është e nevojshme. Sepse vendet e pasura duhet ta bëjnë një gjë të tillë vullnetarisht. Por ka edhe mundësi që të nxiten reforma, prej të cilave pak a shumë përfitojnë të gjithë njerëzit."

"Unë do t'ju jap një shembull: Sot kemi të gjitha llojet e mundshme të teknologjisë moderne, me ndihmën e të cilave mund të zvogëlohet në masë të madhe ndotja e ambientit, që shkaktohet nga fabrikat. Por këto teknologji janë patentuar dhe për këtë arsye janë relativisht të shtrenjta. Dhe ata, që i kanë bërë shpikje, dëshirojnë sigurisht që të paguhen për shpikjen e tyre. Kjo ka pasoja të shumta, sidomos për vendet e varfra, që nuk kanë para për të paguar teknologji të tilla dhe preferojnë të përdorin p.sh. modelin e vjetër sovjetik të një termocentrali, për shkak se ai është më i lirë se ato modernet, që kushtojnë shumë për shkak të tarifave për patentat."

Pogge shpjegon se vendet e pasura duhet t'i ulin pretendimet për standardin e tyre të jetesës, për të shërbyer si shembull, apo model për vendet e varfra. Njerëzit, që jetojnë në Afrikë apo Indi dhe shohin programe televizive nga Amerika apo Evropa mundohen të kopjojnë modelin e jetesës dhe të mirëqënies së këtushme. Dhe duke parë që njerëzit në perëndim kanë BMW apo Mercedes edhe ata duan makina të tilla dhe heqin dorë p.sh. nga biçkleta. Një rast tjetër është p.sh. MacDonald`s, i cili në Kinë apo Indi ka bërë që shumë njerëz të heqin dorë nga ushqimi i tyre tradicional apo vegjetarian, sepse duan të ushqehen si amerikanët.