OCDE kritikon kulturën e arsimimit në Gjermani

Ata flasin për të njëjtin raport. Por ndërsa Heino von Meyer, drejtues i qendrës së OECD në Berlin e komunikon raportin aktual të organizatës për bashkëpunimin ekonomik mbi arsimin si paralajmërim për politikën gjermane, ministrja gjermane e Arsimit, Johanna Wanka (CDU), gëzohet për shifrat e prezantuara. Ai sheh se si gjermanët në krahasim ndërkombëtar mbeten gjithnjë e më shumë prapa. Ajo sheh zhvillime pozitive. Me një vështrim anash nga përfaqësuesi i OECD-së ministrja Wanka thotë: "Nuk mund t'i besosh asnjë statisktike, të cilën nuk e ke interpretuar vetë." Sipas ministres Gjermania ka arritur shumë një dhjetëvjeäarin e fundit. "Pjesëmarrja në arsim është mbi mesataren: Që nga arsimi parashkollor deri tek ai pasuniversitar, ndërsa tek ata që nisin studimet kemi arritur nivelin 50 përqind.."

Por edhe von Meyer i beson më mirë interpretimit të tij të studimit, që krahason nivelin arsimor të Gjermanisë me atë të 33 vendeve të tjera anëtare të OECD-së në pesë kontinente. Studimi me titull "Arsimimi me një vështrim në 2014" numëron në 750 faqe 30 tregues, që nga koha, që nxënësit kalojnë në klasë, deri te pjesa e prodhimit të brendshëm bruto për arsimin. Sigurisht Gjermania ka shifra pozitive, mendon funksionari i OECD-së, por vendet e tjera nuk flenë. "Ata bëhen shpejt gjithnjë e më mirë se Gjermania". Studimi konstaton se që prej një brezi numri i personave me arsim të lartë rritet pak në Gjermani. “Nuk duhet të flemë mbi dafinat e asaj që është arritur“, kërkon von Meyer.

Sa më i arsimuar, aq më shumë para

Me nivel të ulët arsimor shtohen rreziqet. Sepse një arsimim i mirë sipas OECD është mbrojtja më e mirë nga papunësia. Gati 13 përqind e njerëzve me kualifikim të ulët në Gjermani janë pa punë, por vetëm 5,3 përqind e atyre me maturë. Ndërsa tek ata që kanë arsim të lartë kuota e papunësisë është 2,4 përqind. Edhe pagat rriten me arsimin. Akademiket në Gjermani sipas studimit ndodhen 74 përqind mbi ata me arsim të mesëm. Kjo tendencë, kritikojnë ekspertët e OECD, është thelluar shumë në dhjetëvejçarët e fundit. Në vështrim ndërkombëtar pagat midis grupeve të sipërpërmendura nuk kanë një dallim kaq të madh, por sidoqoftë ata janë rreth 59% larg njëra tjetrës

Raporti i OECD arrin në përfundimin, se në Gjermani është më e vështirë se në shumicën e vendeve të tjera, që të ngjitesh mbi nivelin arsimor të prindërve. Vetëm 24% janë më të arsimuar dhe prindërit dhe 18% mbeten poshtë nivelit të tyre. Tek të rinjtë madje vetëm 19% ua kalojnë prindërve të tyre dhe 24% janë nën nivein e tyre arsimor. Sidomos pasardhësit e atyre me nivel jo të lartë arsimor i shkaktojnë shqetësim OECD. Në krahasim me vendet e tjera në Gjermani ata arrijnë shumë më rrallë që të studjojnë. "Shanset e një akademiku janë dyfish më të larta“, konstaton von Meyer dhe kritikon politikën se nuk e ka mbajtur premtimin "Ngjitje përmes arsimimit".

Ministrja mbetet optimiste

Ministrja e Arsimit Wanka nuk do që të bashkohet me këtë vlerësim. "Për ato fëmijë, për ato të ri, rëndësi ka që të zgjedhin rrugën e duhur, pavarësisht se äfarë statusi kanë prindërit", thotë ajo në bisedë me Deutsche Wellen. Asaj nuk i pëlqen që studimi i OECD e paraqet aq negativisht faktin, kur të rinjtë nuk e arrijnë nivelin arsimor të prindërve të tyre." Qëllimi nuk është të ruhet statusi. Përse duhet të jetë rënie, kur e bija e një dentisti vendos të punojë në një dyqan optike?", pyet ajo veten. Gjermania ka një të ardhme të vështirë demografike. Politikanja e CDU-së tregon spektrin e mundësive për të hyrë në sistemin arsimor. "Tani nuk duhet të kesh patjetër maturën, për të studjuar, kjo është e rregulluar më së miri me ligj. Në të ardhmen kjo duhet të vihet në jetë në atë mënyrë, që sa më shumë të mund të përfitojnë.“