Nisni Vettingun, të nisim negociatat për anëtarësim në BE!
4 Mars 2017
Në orët e pakta të vizitës në Tiranë, në mbrëmjen e djeshme (3 Mars 2017), në kuadër të një turi në Ballkan, Federica Mogherini, Përfaqësuesja e Lartë e BE për Politikën e Jashtme dhe Sigurinë, Zv. Presidente e Komisionit Europian shprehu qartë dhe prerë qëndrimin e BE ndaj bllokimit të fillimit të procesit të rivlerësimittë gjykatësve dhe prokurorëve ose si njihet ndryshe Vettingut. Bojkoti i parlamentit nga opozita, e cila ka 50% të komisionerëve në komisionet e Vettingut ka sjellë bllokimin konkret të zbatimit të reformës në drejtësi. Pasi ata nuk mund të fillojnë nga puna pa miratimin nw Parlament edhe me votat e opozites. "Bojkoti i opozitës është qartazi një bllokim i reformës dhe i vettingut, bllokim i procesit të anëtarësimit të Shqipërisë në BE”, tha Mogherini në Tiranë, pas takimit me kryeministrin Rama.
Mogherini - Loja e futbollit bëhet brenda fushës dhe jo jashtë saj
Opozita braktisi Parlamentin më 16 shkurt si kundërshtim ndaj përjashtimit për 10 ditë nga punimet e parlamentit të deputetit demokrat, Flamur Noka, për shkak se qëlloi me letër gjatë seancës plenare një deputet socialist. Dy ditë më pas opozita nisi protestat përballë zyrës së kryeministrit Rama, të cilat po vazhdojnë. Kërkesat e PD, që drejton protestën, janë një qeveri teknike që të kryejë vettingun dhe njëherazi të garantojë zgjedhje të lira dhe të ndershme. Por rrruga e bojkotit të Parlamentit është kritikuar nga Mogherini. Ajo i beri thirrje opozites të kthehet në Parlament dhe të realizojë në rrugë institucionale kërkesat e saj si për garantimin e zgjedhjeve të lira dhe të ndershme ashtu edhe për kryerjen e vettingut. "Loja e futbollit bëhet brenda fushës dhe jo jashtë saj. Betejat duhet të bëhen brenda institucioneve, Parlamentit në këtë rast. Politikanët kanë përgjegjësinë për të punuar brenda institucioneve.” theksoi ajo në Tiranë.
Bojkoti i Parlamentit – rrezikon integrimin në BE
Kthimi i opozitës në Parlament, votimi i komisionerëve në komisionet përkatëse të vetting-ut , fillimi i funksionimit të tyre do të hapte dritën e gjelbër edhe për hapjen e negociatave të anëtarësimit mes BE dhe Shqipërisë. "Reforma në drejtësi ndikon edhe në hapjen e negociatave. Ne jemi besimplotë që vettingu do të zbatohet në Shqipëri Ata që po përpiqen të rrezikojne reformën apo të ulin ritmin e saj do të rrezikojnë integrimin në BE. Bllokim i Kuvendit do të thotë bllokimi i komisionit të vettingut dhe kjo pengon edhe integrimin në BE në një kohë kur Shqipëria ka vërtet mundësi të ecë përpara në procesin e integrimit”, theksoi Mogherini.
Politika të ndërmarrë hapa për zbatimin e vettingut.
Mogherini i ka bërë thirrje politikës- maxhorancës qeverisëse dhe opozitës të gjejnë zgjidhje për të zhbllokuar zbatimin e reformës në drejtësi. "Reformën në drejtësi nuk e kërkon Brukseli, por qytetarët e Shqipërisë. Qytetarët kërkojnë drejtësi të pavarur. Reforma në drejtësi do të sjellë besimin te drejtësia. Është përgjegjësi e institucioneve që ta përmbushin këtë reformë. Një sistem i pavarur i drejtësisë lufton krimin e organizuar, korrupsionin, do të tërheqë të rinjtë e interesuar për biznes dhe investitorët. Ka ardhur koha që Shqipëria të marrë hapat e duhura, ne nga ana jonë jemi gati të hapim negociatat”, ka thënë Mogherini.
A do të fillojë dialogu mes palëve dhe kthimi i opozitës në Kuvend?
Sinjalin e ka dhëne i pari koalicioni qeverisës, dje, në ditën e vizitës së Mogherimit në Tirane. Ky koalicion fton opozitën të ulen në tryezën e bisedimeve " në Kuvend apo tryezë dialogu” për të parë propozime konkrete dhe realiste të opozitës për procesin zgjedhor”, thuhet në deklaraten e mazhorancës. Por opozita në përgjigjen ndaj ftesës kushtëzon dialogun me krijimin e një pakti kombëtar dhe qeverie teknike si të vetmet rrugë për zgjidhje të lira dhe të ndershme dhe për zbatimin e vettingut.
Federica Mogherini u takua me autoritetet më të larta të Tiranës: kryeministrin Rama, Ministrin e Jashtëm Bushati, Presidentin Nishani dhe liderin e opozitës, Lulzim Basha. Të shtunën, (4 mars 2017) Mogherini do të niset nga Tirana drejt Kosovës, vend me të cilin ajo përfundon turin ballkanik në Mal të Zi, B-H, Serbi, Shqipëri, Kosovë.