Gjermani:Kaos në parlamentin e landit pas skandalit me AfD

Mbledhja e parë e parlamentit të Tyringisë pas debateve të ashpra disa orësh të enjten (26.09.)u ndërpre. Një procedurë rutinë parlamentare, ku zgjidhet presidenti i parlamentit dhe zihen poste të rëndësishme u kthye në një grindje të ashpër mes partisëAfD,  e shpallur nga Zyra për Mbrojtjen e Kushtetutës si "e sigurt ekstremiste e djathtë" dhe partive të tjera në parlament. Seanca u ndërpre pa mundur të zgjidhet presidenti i parlamentit të landit.

Si rregull grupi më i madh parlamentar në parlament ka të drejtë të propozonjë presidentin e parlamentit të landit.  Në Tyringi ky grup vjen nga AfD, e cila në zgjedhjet në fillim të shtatorit fitoi shumicën e votave në land-. CDU dhe Aleanca Sahra Wagenknecht, BSW donin me një kërkesë për ndryshimin e rendit të ditës të ndryshonin procedurën, dhe të pengonin kështu që AfD të bënte propozimin për postin. Por puna nuk erdhi deri tek kërkesa.

CDU i drejtohet Gjykatës Kushtetuese

Politikani i AfD-së, Jürgen Treuttler, i cili si deputeti më i vjetër drejtoi seancën refuzoi me orë të tëra të votohej për këtë kërkesë. Disa herë pati ndërprerje dhe debate të ashpra. Grupi parlamentar i CDU-së pas kësaj iu drejtua me telefonatë Gjykatës Kushtetuese të Tyringenit. Sipas CDU, drejtuesi i seancës, Treuttler disa herë shkeli kushtetutën dhe të drejtat e deputetëve. Drejtuesi i grupit parlamentar të CDU, Andreas Bühl tha se pas një seance të tillë, se ky ishte "mjeti i fundit" për grupin parlamentar të CDU-së. Gjykata Kushtetuese tani duhet të vendosë, nëse është e lejueshme, që deputetët e rinj të sapozgjedhur mund të japin një rend të ri dite të seancës parlamentare.

Pas sesionit të parë kaotik të parlamentit të landit në Tyringi, ministri i Brendshëm në detyrë i Tyringisë, Georg Maier foli për një procedurë të ndalimit tër AfD. "Ngjarjet e sotme (e enjte, 26.09. shën red.) në parlamentin e shtetit tyringian kanë treguar se AfD po ndërmerr veprime agresive, luftarake kundër parlamentarizmit. Mendoj se kushtet për një procedurë ndalimi janë plotësuar", shkroi politikani i SPD në Platformën X.

la/tgsch