یونیسف: د هرات د زلزلې ۹۰ سلنه قربانیان ښځې او ماشومان دي
۱۴۰۲ مهر ۲۰, پنجشنبه
د ملګرو ملتونو د ماشومانو صندوق اعلان کړی دی، چې په هرات کې زلزلې ښځو او ماشومانو ته تر ډېر زیانونه اړولي دي.
د ملګرو ملتونو ادارې د چهار شنبې په ورځ ناوخته پر خپل اکس پاڼې لیکلې ول چې په هرات ښار کې د پر له پسې زلزلو قربانیان ۹۰ سلنه ښځې او ماشومان دي.
د شنبې په ورځ د ۶،۳ ریشتر زلزلې د هرات ولایت چشت روز ته نږدې سیمې په داسې حال کې ولرزولې چې نارینه تر ډیره په بهر کې په کارونو بوخت وو او ښځې د ماشومانو سره په کورونو کې پاتې وې.
اوس زلزله ځپلي پرته له سرپناوو پر ډاګ پاتې دي، له لومړنیو اړتیاوو نیولې بیا د څښاک اوبو، خیمو او کمپلو ته سخته اړتیا لري.
یونیسف ویلي دي چې خلکو ته د څښاک د پاکو اوبو رسولو سیستم بیخي ویجاړ شوی دی. دغه سازمان وایې پرون یې زلزله ځپلو سیمو ته د پاکو اوبو ټانکرونه لیږدولې څو ۱۸ زره کسانو ته پاکي اوبه ورسيږي.
په ورته وخت کې یونیسف له زلزلې ځپلو سره د عاجلو مرستو له پاره د ۲۰ میلیونو ډالرو غوښتنه هم کړې ده. د یونیسف په خبرپاڼه کې راغلي دي: «ماشومان تر ټولو ډیر زیانمن شوې او عاجلو مرستو ته اړتیا لري. موږ انتظار نشو کولی. مهرباني وکړئ زموږ سره مرسته وکړئ چې د دوی ژوند وژغورل شي.»
د ملګرو ملتونو د نفوسو صندوق هم اعلان وکړ چې په دې زلزله کې ۳۰۰ میندواره ښځې ټپیانې شوې دي. د دغې ادارې د معلوماتو له مخې، د دغو مېرمنو روغتیايي وضعیت د اندېښنې وړ دی.
د ځینو هیوادنو له خوا د مرستې کولو ټټر وهل شوی دی
د ابو ظبۍ د زايد بن سلطان النهيان بشري او خيريه بنسټ د دغه هېواد د بهرنيو چارو وزارت سره په همکارۍ د خوراکي او طبي توکو تر څنګ نور امکانات هم برابر کړي دي.
پاکستان، ايران او چين د خوراکي موادو، کمپلو، طبي شيانو، خېمو او پيسو د لېږلو ژمنه کړې ده. د پاکستان لومړي وزير، انوارالحق کاکړ ويلي دي چې کابل په تېره د طبي کارکوونکو، ګرځنده روغتونونو، خېمو او کمپلو غوښتنه کړې چې دغه مواد د نورو مرستو ترڅنګ اوس پر لاره دي.
د شنبې ورځې په زلزله کې شاوخوا ۲۵۰۰ کسان وژل شوي دي. د هرات د حوزوي روغتون د راپور له مخې، د چهارشنبې په ورځ په همدې سیمه کې بیا زوروره زلزله وشوه، چې له امله یې یو تن مړ او ۱۵۳ نور ټپیان شول.