په افغانستان کي د القاعدې مشران وژل سوي
۱۳۹۵ آبان ۶, پنجشنبه
د امريکا د دفاع وزارت د معلوماتو له مخي فاروق القطاني او بلال العطبي، چي له ډېرو کلونو راهيسي ئې په افغانستان کي فعاليت کاوه او لټون پسې روان وو، په کونړ ولايت کي د بې پيلوټه الوتکو په بريد کي وژل سوي دي.
د پنتاگون د معلوماتو له مخي القطاني، له ډېري مودې راهيسي د افغانستان په شمال کي د القاعدې مشري کوله او «په دې تلاښ کي وو چي هلته د القاعدې غړو د اوسېدو خوندي ځايونه جوړ کړي.»
ويل سوي چي هغه په افغانستان کي پر امريکايي او نړيوالو ځواکونو د بريدونو پلانونه جوړول. په القطاني پسې له څلور کلونو راهيسي لټون روان وو.
د العطبي، په اړه بيا ويل سوي دي چي هغه د افغانستان په جنوب کي د القاعدې مشري کوله او هلته ئې د بهرنيو جنگياليو د بيا راټولو او روزلو دنده لرله.
د امريکا د دفاع وزارت ويلي دي چي پر دغو دوو کسانو باندي د يکشنبې په ورځ د افغانستان په کونړ ولايت کي د څو بې پيلوټه الوتکو په مرسته بريدونه سوي دي. د پنتاگون دغه د بريا خبر ته بايد سړی تر اوسه لا د شک په سترگه وگوري، ځکه د بريد په اړه ارزوني لا بشپړي سوي نه دي.
د پنتاگون وياند پيتر کوک، ويلي دي چي د «هغوی مړينه به د القاعدې تروريستي شبکې له پاره يوه ستره ضربه وي.» د دوی مړينه د افغانستان، امريکا متحدو ايالاتو او متحدانو له پاره ئې د گواښ د لږېدو سبب کيدای سي.
امريکا متحدو ايالاتو په روان کال کي پر القاعدې شبکې باندي نژدې ۷۰۰ هوايي بريدونه کړي دي. تېرکال دغه بريدونه ۵۰۰ ول. پر القاعدې باندي د بريدونو ډېرښت د دې ښکارندوی دي چي امريکايي ځواکونه به په راتلونکې کي هم په افغانستان کي ښکېل پاته سي.
نور مطالب: