۳۰ افغان مهاجر د يونان لیسبوس ټاپو ته ورسيدل
۱۳۹۸ اسفند ۱۲, دوشنبه
د رويټرز خبري آژانس په حواله، وروسته له هغې چې ترکيې تيره اوونۍ له يونان سره خپل سرحدونه د مهاجرو پر مخ خلاص کړل، دا د مړينې لومړنۍ پيښه ده. په رپوټ کې د ماشوم د هويت په اړه څه نه دي ويل شوي.
د يونان ساحلي ساتونکي وايي د ليسبوس په اوبو کې د مهاجرو اوښتې کښتۍ په يوې ترکيي کښتۍ کې راوړل شوې وه. په دغې پيښه کې ۴۶ کسان ژغورل شوي دي او دوه نور ماشومان روغتون ته وړل شوي دي. د يوه ماشوم روغتيايي وضعيت د انديښنې وړ ښودل شوی چې کیدای شي ونه ژغورل شي.
رويټرز دغه راز وايي چې د دوشنبې په سهار وختي ۳۰ تنه افغان مهاجر هم د يونان لیسبوس ټاپو ته رسيدلي او ۳۲ نور ژغورل شوي دي. دغه کسان ترکيې ته نژدې د فرمکونیسي (Farmakonisi) په نوم يوه کوچني ټاپو کې ژغورل شوي دي.
له دې نه علاوه، دوو ترکي امنيتي ځواکونو رويټرز ته ويلي چې يو سوريايي مهاجر د دوشنبې په ورځ د يونان په سرحد کې هغه ته د اوښتو ټپونو له امله ساه ورکړه. د ترکي ځواکونو په خبره ياد سوريايي مهاجر غوښتل د ترکيې له لورې د يونان خاورې ته دننه شي خو يوناني ځواکونو يې مخه ونيوله. خو آتن بيا دغه ادعا رد کړې او دا يې »جعلي خبر« بللی دی.
ترکيې د تيرې پنجشنبې په ورځ(د ۲۰۲۰م کال د فبروري ۲۷مه)، له يونان او بلغاريا سره خپل ځمکني سرحدوند، اروپا ته د تلونکو مهاجرو پر مخ خلاص کړل. تر هغه وروسته له ترکيې څخه څه د باندې ۱۰ زره مهاجر د اروپايي اتحاديې د دغو دوو غړو هيوادونو پولو ته رسيدلي دي. په دغو مهاجر کې ډيری يې د منځني ختيځ هيوادونو، سوريې او افغانستان دي. په رپوټونو کې د مهاجرو او امنيتي ځواکونو ترمنځ د رامنځ ته شوو اخ و ډبونو هم ويل شوي دي.
زياته شوې چې يوناني او ترکي ځواکونو د شنبې او يکشنبې ورځو د مهاجرو پر ګڼې ګوڼې اوښکې بهونکي ګاز شيندلي دي. د يونان پوليس وايي چې د يکشنبې ورځې (د مارچ لومړۍ) سهار راهيسې لږ تر لږه ۱۰۰۰ مهاجر د يونان آژه ټاپو ته رسيدلي دي.
اروپايي اتحاديې په ۲۰۱۶م کال کې ترکيې سره يو تړون لاسليک کړ چې له مخې يې ترکيې اروپا د تلونکو مهاجرو مخنيوی کاوه، خو دغه هیواد تيره اوونۍ وويل چې نور نه شي کولای د مهاجرو مخه ونيسي. ترکې تر دې وړاندې هم اروپايي اتحاديې ته د تړون د لغوه کيدو خبرداري ورکړي وو. دغه هيواد د ۳ اعشاريه ۷ ميليونه سوريايي مهاجرو کوربتوب کوي.
آژانسونه/م.ک.ص/ب.ص