’رنگ دی پيښور‘

دغه کمپاين د کلتور او سياحت وزارت په مشرتوب په درو پړاونو کې ترسره کیږي. په لومړي سر کې د ښار د مرکز، او بیا د ښار د نورو برخو دېوالونه په مختلفو رسامیو او رنگونو ښایسته کیږي.

د پاکستان د نورو ښارونو په شان د پيښور ښار پر دېوالونو هم د مختلفو شرکتونو او کمپنیو اعلانونه رسم شوي دي، چې د ښار ښکلا یې ورکه کړې ده. د دېوالونو د پاک ساتلو او دا ډول اعلانونو د ختمولو له پاره په ایالتي کچه قانون او مقرره هم جوړیږي.

’رنگ دی پيښور’ د کمپاين د پيلیدو په لومړۍ ورځ ډیرو عامو خلکو او زده کوونکو هم په دې کمپائن کې برخه واخیستله.

پر ځوانانو او زده کوونکو سربیره، نقاشانو، هنرمندانو او د کلتوري څانگو ادارو مسئولینو هم په دې کمپاين کې برخه واخیستله او په زړه پوري هنري نموني او رسامۍ یې پر دېوالونو رسم کړې.

د پيښور پوهنتون یوه زده کوونکې نادیه وایې چې دا یو ډیر ښه اقدام دی: «زه خوشحاله یم چې په دې کمپاين کې برخه اخلم. له دې سره د سیمې په ښکلا کې زیاتوالې رازي.»

په داسي حال کې چې پیښور له څو کلونو راهیسې د ترهگرو په جال کې بند پاته دی، خو د ’رنگ دی پيښور’ په کمپاين کې ډیرو ښځو هم گډون کړی وو. له دې څخه معلومیږي چې د پيښور خلک په هر ډول حالاتو کې په مثبتو حرکتونو کې په ډیري لیوالتیا سره گډون کوي.

پر دېوالونو د رسامۍ او رنگولو مخکې چارواکو د دېوالونو نقشې جوړي کړي وې. په دې نقشو او طرحو کې د رنگونو، نقاشیو او رسامیو اندازه او نور کوایف له مخکې ټاکل شوي ول. په لومړي سر کې یوازي خام انځور یا خاکه جوړیدله او بیا هغه په رنگونو ډگیدله.

د خیبر پښتونخوا د کلتور ریاست مشر وایې چې دغه کمپاين د ښار ښکلا ته د رونق ورکلو له پاره پیل شوی دی: «له دې سره ښاریانو ته دا پيغام ورکول کیږي چې د دېوالونو په پاکولو کې برخه واخلي، ځکه دا د ټولو گډ مسئولیت دی».

که له یوې خوا د ’رنگ دی پيښور’ په کمپاين کې په سونو داوطلبانو برخه اخیستې وه، له بلې خوا سیمه ایز حکومت دا د سولي یو پیغام بولي.

نټ اینډ کلیین پښاور، د کمپاين په ترڅ کې ښاریانو پر دېوالونو د نقاشۍ او رسامۍ تر څنگ له ښار څخه د گندگۍ او کثافتاتو د لیري کولو کمپاين هم پیل کړی دی. په دې کمپاين کې ځوانان په عملي توگه برخه اخلي.

د ’رنگ دی پيښور’ کمپاين یو بل هدف پر دېوالونو له نقاشۍ او رسامۍ سره د هیواد په مختلفو برخو کې د توریزم سکتور پوري د اړونده ساحو ځنې برخي هم برجسته کیږي، چې له امله یې دغه سکتور ته گته رسیږي.