راپور: د بې پيلوټه الوتکو بريدونه لږ سوي دي
۱۳۹۲ بهمن ۱۶, چهارشنبه
امریکايي ورځپاڼي واشنګټن پوسټ د سه شنبې په ورځ د یوه امریکايي چارواکي په حواله لیکلي دي. پاکستان په دې اړه واشنګټن ته وړاندیز وکړ او واشنګټن هم هغې ته د نه ځواب ور نه کړ.
د واشنګټن پوست د دغه رپوټ پر بنسټ د امریکا متحده ایالاتو د ولسمشر بارک اوباما ادارې دا هم ویلي دي چې د القاعدې د ترورستي شبکۍ د کوم لوړ پوړي غړي د موجودیت او یا امریکایانو ته د مستقیم خطر په صورت کې به د بې پيلوټه الوتکو بریدونه ترسره کړي.
د دغې ورځپاڼي په حواله د تیر کال له دسمبر میاشتي راهیسي د بې پيلوټه الوتکو د بريدونو لړۍ بنده شوې ده، چې دا له ۲۰۱۱ کال راهيسي تر اوسه پوری د بې پيلوټه الوتکو د بریدونو د بندیدو تر ټولو اوږده موده ده. د یادونې وړ ده چې تر اوسه پوري نورو سرچینو دا ډول رپوټونه تایید کړي نه دي.
واشنګټن پوست زیاته کړې ده چې په پاکستان کې د بې پیلوټه الوتکو په بریدونو کې له هغه وروسته کمښت راغلی دی، چې تیر کال په دغه هیواد کې د پاکستاني طالبانو د غورځنګ یو پخوانی مشر حکیم الله محسود، د یوه بې پيلوټه الوتکۍ په برید کې ووژل شو.
دغه برید د پاکستان د بهرنیو چارو سلاکار سرتاج عزیر تر هغه اعلان یوه ورځ وروسته ترسره شو، چې هغه ویلې وه امریکا ژمنه کړې چې له طالبانو سره د سولي د خبرو په جریان کې به د بې پيلوټه الوتکو بریدونه نه ترسره کوي.
د پاکستان لومړي وزیر نواز شریف هم ویلې دي چې هغه د امریکايي بې پيلوټه الوتکو د بریدونو بندیدل غواړي. بله خوا د پاکستان ولس د بې پيلوټه الوتکو د بریدونو په هکله بېلا بېل نظرونه لري.
که له یوې خوا یو شمیر پاکستانیان په دې اند دي چې د عنعنوي عملیاتو په پرتله د بې پيلوټه الوتکو بریدونه د طالب جنګیالیو پر وړاندي یوه اغېزمنه وسیله ده او د ملکي تلفاتو شمیر پکښې کم وي، بلي خوا ځني ډلي بیا د دغو بریدونو مخالفت کوي.
دوی وايي نه یوازي دا چې د بې پيلوټه الوتکو بریدونه په خلکو کې ډار پيدا کوي او ملکي خلک پکښې وژل کیږي، بلکي دا د پاکستان د خپلواکۍ خلاف یو عمل دی.
د یوې بریتانوۍ ادارې له خوا د یوه خپاره شوي تازه کلني رپوټ پر بنسټ، تیر کال د امریکا له خوا د پاکستان په خاوره کې د بې پیلوټه الوتکو د ترسره شویو بریدونو په پایله کې په مجموعي توګه یوازي ۴ تنه ملکي وګړي وژل شوې دي.
د دغه رپوټ پر بنسټ دا د بې پيلوټه الوتکو د بریدونو په تاریخ کې چې له ۲۰۰۴ کال راهیسې پيل شوې دي د ملکي تلفاتو تر ټولو کښته کلنۍ احصايیه ښيې.