د هند په یوه معبد کې خلکو یو سړی په وهلو سره وژلی
۱۴۰۰ آذر ۲۸, یکشنبه
ځايي رسنيو ويلي چې پيښه د هند په شمالي ښار امرتسار کې د شنبې په ماښام هغه مهال رامنځ ته شوه چې يو ناپيژاندي کس په داسې حال کې چې خلک په عبادت بوخت ول، د پنجرې له سره د معبد په منځ کې مقدس ځای ته ورټوپ کړل.
د NDTV په نوم رسنۍ وويل چې دغه سړي غوښتل د سیکهانو مقدس کتاب، ګرو ګرانت صاحب، مخې ته ايښې توره راواخلی چې د عبادت کوونکو له خوا يې مخه ونيول شوه او بیا يې په وهلو ډبولو مړ کړ.
د پنجاب ایالت وزیر اعلی چرنجیت چنا د یاد سړي دغه عمل د «تر ټولو بدمرغه او ناوړه عمل» په توګه غندلی دی. د هغه دفتر د شنبې په ورځ د دغې پيښې په اړه پر ټويټر پيغامونه خپاره کړي، چې پورتنۍ خبره هم په کې شوې ده.
د فرانسې خبري آژانس په حواله، چنا همدارنګه د پيښې په تړاو د تحقیقاتو امر کړی تر څو روښانه شي چې د دغه «ناوړه عمل تر شا اصلي انګیزه او توطیه څه ده.»
په سيکه ټولنه کې د ګرو ګرانت صاحب او د سیکهانو د معبد پر وړاندې بي حرمتي، یوه لويه حساسه موضوع ګڼل کيږي.
په ۱۹۸۴ کې د هندوستان پخوانۍ صدراعظمه ایندرا ګاندي د خپل یو سیکهـ ساتونکي له خوا وروسته له هغې په قتل ورسیده چې هغې له ګولدن تيمپل معبد څخه د بیلتون غوښتونکو د شړلو له پاره پر معبد د يوې پوځي حملې امر ورکړ.
ash/gle/oho