د ایران د اتومي پروګرام په خبرو کې نوی ضرب الاجل وټاکل شو

امریکا متحده ایالاتو او ایران ګواښ کړی دی چې په ویانا کې د تهران د اتومي پروګرام پر سر له روانو خبرو اترو څخه به بهر شي. ایران او شپږو نړیوالو ځواکونو چې امریکا متحده ایالات، بریتانیا، فرانسه، چین او آلمان په کې شامل دي د دوشنبې ورځ د یوه توافق رامنځ ته کیدو له پاره د ضرب الاجل په توګه ټاکلې ده.

دغه هیوادونه غواړي چې له ایران سره داسې یوه توافق ته ورسیږي چې له مخې یې ایران خپل اتومي پروګرام محدود کړي او په عوض کې هغوی پر دغه هیواد باندې لګیدلي بندیزونه کم کړي.

له دې سره نو دا دریم ځل دی چې په خبرو اترو کې ښکیل هیوادونه ټاکل شوی ضرب الاجل تمدیدوي. ایران ادعا کوي چې نړیوال ځواکونه ډیرې لویې غوښتنې کوي او خپل موقف یې بدل کړی دی. په اصل کې ټاکل شوې وه چې د خبرو اترو دغه بهیر د جون میاشتې پر ۳۰مه نیټه پای ته رسیدلی وای.

د امریکا متحده ایالاتو د بهرنیو چارو وزیر جان کیري، د جمعې په ورځ وویل چې په ځینو برخو کې پرمختګونه شوي دي خو روښانه یې کړه چې ځینې مسایل اوس هم ناحل شوي پاتې دي.

کیري او د هغه ایراني سیال محمد جواد ظریف، په تیرو وختونو کې څه نا څه هره ورځ یو له بل سره لیدلي دي خو دیپلوماتان وایي د خبرو اترو په جریان کې یو لفظي شخړه رامنځ ته شوې ده چې له کبله یې بهیر د یوې مودې له پاره دریدلی دی.

کارپوهان وایي چې که دواړه اړخو یو له بل سره موافقې ته ورسیږي نو د دغو هیوادونو په پارلمانونو کې د رامنځ ته شوي تړون تایید به بیا هم یو ستونزمن کار وي.