تورخم دروازه د هر ډول تګ راتګ پر مخ پرانستل شوه
۱۴۰۱ اسفند ۶, شنبه
د ټویټر په دغه لنډ پیغام کې راغلي: «د تورخم دروزاه سر له نن شنبې د فبرورۍ ۲٥ مه، د هر ډول تګ راتګ پرمخ له دواړو طرفونو خلاصه شوه.»
پنځه ورځې مخکې د طالبانو ادارې خبر ورکړ، چې د پاکستان له خوا د «ژمنو نه عملي کولو» له امله یې دغه دروازه وتړله. کابل ته د پاکستانیو چارواکیو له ورتلو یوه ورځ وروسته طالبانو د دروازې د پرانیستلو خبر ورکړ، خو ډېر ژر پاکستاني اړخ وتړله.
پرون جمعه بیا تورخم دروازه د افغان او پاکستانیو مسافرینو پر مخ په «محدود ډول» پرانیستل شوې وه.
تورخم دروازه په محدود ډول پرانستل شوه
د افغان سوداګرو په وینا، د تورخم دروازې له نیږدې یوې اونۍ تړل کېدو له امله دواړو لوریو ته د خوراکي او غیرخوراکي توکیو څخه د بار زرګونو لاریو درېدو له امله ډېر مالي زیان وراوښتی.
تورخم کې د تنظیرالله په نوم یوه کس دویچه ویله ته وویل، نن شنبه سهار مهال دروازه د هر ډول تګ راتګ پر مخ خلاصه شوې او د عامو خلکو سربېره سوداګریز موټر له دواړو خواو پر دغې لارې تېرېدلی شي.
په تورخم کې په زرونه لارۍ بندې پاتې دي
د دغې ترانزیتي او سوداګریز بندر د بندېدو له امله عام خلک هم له ستونزو سره مخ وو او هره ورځ به زرګونه خلک د کرښې دواړو خواو ته په دې هیله ورتلل، چې پښتونخوا یا افغانستان ته ولاړ شي. د عامو خلکو د مالوماتو له مخې، پاکستانۍ غاړې په دغو ورځو کې آن «ډېرو بېړنیو» ناروغانو ته هم د اوښتو اجازه نه ورکوله.