ترکیه د پیسو سپینولو په خړ لست کې اچول شوې
۱۴۰۰ مهر ۳۰, جمعه
د پنجشنې په ورځ د مالي اقدام ځانګړې ډلې یا (اف. اې. ټي. اف) په یوه تازه اقدام سره د ترهګرۍ د تمویل او د پیسو سپینولو په برخه کې د ترکیې نیمګړتیاوو ته په کتو سره دغه هیواد د پیسو سپینولو په تور تر څار لاندې نیسي. د یاد نړیوال سازمان مشر مارکس پلیر په یوه خبري غونډه کې په دې هکله وویل چې پر مالي معاملاتو باندې د ترکیې د کنترول په برخه کې «جدي ستونزې پر ځای پاتې دي.»
پلیر خبریالانو ته همدا راز وویل چې د ترکیې حکومت د پیسو سپینولو پر ضد د سیستم د تقویې له پاره د لا ډیرو هڅو ژمنه کړې ده. هغه وویل: «ما دوی ته وویل چې دغه ژمنې په عمل بدلې کړي.»
د دې سربیره، د پیسو سپینولو پر ضد دغه نړیوال سازمان همدا راز وویل چې ترکیې په ځینو برخو کې پرمختګونه کړي دي. دغه سازمان ویلي چې ترکیې د پیسو سپینولو او د تروریزم د تمویل سره د مبارزې له پاره ملي ستراتیژي جوړه کړې او دا چې په ناقانونه توګه یې د پیسو د انتقال مخه نیولې ده.
د مالي اقدام د ځانګړې کاري ډلې د اسنادو له مخې ترکیه غواړي چې د ناثبت شوو پیسو د انتقالاتو له پاره جریمه وټاکي او په دې هکله یې د تحقیقاتو له پاره مالي سرچینې هم ځانګړې کړي دي.
تر اوسه پورې د دغه نړیوال مالي سازمان په خړ لست کې ۳۹ هیوادونه شامل دي کوم چې په نورو هیوادونو کې د پانګې اچونې پر بهیر منفي اغیز کولی شي. دغه پریکړه داسې مهال کیږي چې د ترکیې له وړاندې نه له یوه اقتصادي بحران سره مخامخ دی او پولي واحد يې خپل ارزښت له لاسه ورکړی دی. سربیره پر دې، په دې وروستیو کې په ترکیه د پیسو پړسوب یا توروم هم نیږدې ۲۰ فیصدو ته رسیدلی دی. د ترکیې سربیره، دا ځل په دغه غړ لست کې اردن او مالي هم ورزیات شوي دي.