چاپیریال ته د تمباکو د صنعت ویجاړونکي پایلې
۱۴۰۱ خرداد ۱۵, یکشنبه
دغه نړیوال سازمان د تیرې سه شنبې په ورځ د تنباکو د مخنیوي د نړیوالې ورځې په مناسبت په خپل تازه راپور کې ویلي دي چې هر کال اته میلیونه انسانان د تمباکو څکولو په سبب رامنځته کیدونکو ناروغیو له امله خپل ژوند له لاسه ورکوي. په رپوټ کې زیاته شوې ده چې د تمباکو مصنوعاتو د تیارولو او استفادې په پایله کې، نږدې ۶۰۰ میلیونه ونو، ۲۰۰ زره هکټاره ځمکې او ۲۲ میلیارده ټنه اوبه ضایع کیږي.
د تمباکو د استعمال یا تولید په پایله کې په نړیواله کچه د ګلخانه یي یا شین کوریزو ګازونو په تولید کې هم زیاتوالی رامنځته شوی دی. د تمباکو صنعت له امله هر کال ۸۴ میلیونه ټنه مضره کاربن ډای اکسایډ فضا ته افرازیږي.
د روغتیا نړیوال سازمان په رپوټ کې خبرداری ورکړل شوی دی چې «هر کال په کومه اندازه کاربن ډای اکسایډ چې تجارتي هوایي شرکتونو یي تولیدوي، د هغې د پنځمې برخې په اندازه د تمباکو د صنعت له لارې تولیدیږي. په دې کې د تمباکو تولید، پروسیس او ترانسپورت شامل دي چې په نړیواله تودوخه کې د زیاتوالي سبب کیږي.»
د WHO د روغتیا د ارتقا څانګې مشر رودیجر کریچ، وایي چي هر کال د سیګریټو نږدې ۴،۵ تریلیونه فیلترونه چې د غیر قابل تجزیې پلاستیکو درلودونکي دي د سیندونو، سمندرونو او ساحلونو د ککړتیا سبب ګرځي.
کریچ زیاتوي چې د ځمکې پر مخ تر ټولو ډیره ګندګي د تمباکو له مصنوعاتو څخه خپریږي. په دې کې تر ۷۰۰۰ ډیر زهرجن کیمیاوي مواد شامل وي چې زمونږ چاپیریال ته ویجاړوونکی زیان اړوي.
هغه وویل چې د تمباکو د غورځول شوو مصنوعاتو د راټولو او پاک سازئ مصارف بالاخره د مالیه ورکوونکو له جیب څخه وځي. یوازې په آلمان کې د تمباکو محصولاتو د کثافاتو پاکولو له پاره هر کال ۲۰۰ میلیونه ډالره مصرفیږي.