په ننګرهار کې د پولیو پنځه واکسیناتوران وژل شوي
۱۴۰۰ خرداد ۲۵, سهشنبه
دا پېښې د یاد ولایت په سره رود او خوږیاڼو ولسوالیو او جلال اباد ښار کې د سهار له اوو بجو تر نهو بجو پورې شوي دي.
د ننګرهار د عامې روغتیا ریاست د کتلوي معافیت مشر ډاکټر جان محمد دویچه ويله ته وویل، وسله والو د سې شنبې په سهار د خوږیاڼو ولسوالۍ په چمتلې سیمه کې د پولیو پر دوو واکسیناتورانو ډزې کړي، یو وژل شوی او بل ژوبل شوی دی.
هغه وویل، د همدې ولسوالۍ په کږې بازار کې هم وسله والو یو واکسیناتور په ډزو وژلی دی.
ډاکټرجان محمد دغه راز زیاته کړه، د ننګرهار سره رود ولسوالۍ کې هم دوه واکسیناتوران وژل شوي.
نوموړي وویل، دوه نور واکسیناتوران د جلال اباد ښار په درېمه ناحیه کې هم تر وسله وال برید لاندې راغلي او ټپیان شوي دي.
ویل شوي، دا ټول وژل شوي او ټپیان د پولیو نارینه رضاکاران دي. د پولیو واکسین تېره ورځ پیل شوی دی.
د ننګرهار د عامې روغتیا مسؤلینو خبر ورکړی دی چې له دغو پېښو وروسته یې په جلال اباد او ولسوالیو کې د واکسیناسيون کمپاین ځنډولی دی.
د ننګرهار والي ضیاالحق امرخېل بیا پر خپل رسمي ټویټر په دغه ولایت کې د یوه واکسیناتور د وژل کېدو او پنځو ژوبلېدو خبر ورکړی دی.
د ننګرهار په چپرهار ولسوالۍ کې د پولیو یوه رضاکار دویچه وله ته وویل، د خپلو ملګرو تر وژل کېدو او ټپي کېدو وروسته یې کمپاین درولی او کورونو ته تللي دي.
تر اوسه د دغو تازه پېښو مسؤلیت کوم چا یا وسله والې ډلې نه دی منلی.
د روان میلادي کال په مارچ میاشتې کې هم په ننګرهار کې د پولیو درې کارمنداني په ډزو وژل شوې وې.