ترکيه اپريل کې د افغانستان د غونډې کوربتوب کوي

د ترکيې د بهرنيو چارو وزير مولود چاوش اوغلو د جمعې په ورځ په داسې حال کې دا څرگندوني کوي چې امريکا متحده ايالاتو له افغان چارواکو، د طالبانو له مشرانو او نورو سره د سولې د يوه پلان مسوده شريکه کړې ده چې پکې يې د اوسني حکومت پر ځای د يوه موقتي شراکتي حکومت وړانديز کړی چې تر يوه نوي اساسي قانون لاندي به انتخابات هم تر سره کيږي.
چاوش اوغلو ويلي دي چې ترکيه د سولې پروسې له پيله څخه په دغه بهير کې ښکېله وه. د هغه په خبره امريکا متحده ايالاتو د ترکيې حکومت ته وړانديز کړی چې د افغان حکومت او د طالبانو د استازو تر منځ د سولې د يوه تړون د نهايي کولو د مراسمو کوربتوب وکړي.
هغه زياته کړه: «موږ يو له لږ شمېر هغو هېوادونو څخه يو چې د لاسليک دغو مراسمو ته بلل شوي يوو، او موږ په افغانستان کې له تر ټولو مهمو لوبغاړو څخه يوو.»
د چاوش اوغلو په خبره ترکيه د مذاکراتو په دواړو لورو کې له اعتماد څخه برخمنه ده: «هم طالبانو او هم د مذاکراتو پلاوي، يعنې د حکومت غاړې، زموږ څخه ترمخه هيله کړې وه چې د دغسې يوې غونډې کوربتوب وکړو.»
د چاوش اوغلو په خبره دغه غونډه به د قطر پروسې ته بديل نه وي، بلکې له هغه بهير څخه د ملاتړ په موخه تر سره کيږي.
روسيه هم غواړي چې د روانې مياشتې په ترڅ کې د افغانستان يو کنفرانس راوبولي. دغه خبره د تاس خبري اژانس د سه شنبې په ورځ کړې ده.