په پاکستان کي بمي چاودني او نښتو۱۰ کسان وژلي
۱۴۰۰ دی ۱۰, جمعه
په پاکستان کي په څو جلا جلا پیښو کي لسو کسانو خپل ژوند له لاسه ورکړی دی. د حکومتي چارواکو یوه استازي د جمعې په ورځ خبر ورکړ، چي د یوه مذهبي گوند د محصلینو پر بس د سړک د غاړي ماين په چاودنه کي څلور کسان ووژل شول او څه د پاسه لس نور ټپیان سوي دي. دغه پیښه د پنجشنبې په ماښام د پاکستان د کویټې په ښار کي رامنځته سوې ده.
بلوچستان ایالت چي مرکز يې کويټه ښار دی، د پاکستان یو له لویو ایالتونو څخه شمیرل کیږي. دغه ایالت له افغانستان او ایران سره هم سرحد لري.
د بريد پړه تر اوسه پوري کوم چا یا کومي ډلي پرغاړه نه ده اخیستې. په تیرو وختونو کی پاکستاني طالبانو او داعش، د دغي سیمي مذهبي ډلي او روحانیون د خپلو بریدونو هدف گرځولي دي.
سربیره پردې د جمعې په شپه د پاکستان امنیتي ځواکونو په خیبرپښتونخوا ایالت کي افغانستان ته څرمه د وزیرستان په شمال لویدیځه سیمه کي کورونه تلاشي کړي دي.
د پاکستان د پوځ د یوې اعلامیې پراساس چي د جمعې په ورځ خپره سوې ده، دغه عملیات له اسلامپالو سره په اوږدو نښتو واوښتله چي په نتیجه کي یې څلور سرتیري ووژل سول. د پوځ د معلوماتو له مخي د نورو عملیاتو په ترڅ کي بيا د دغه هیواد په شمال لویدیځ کي دوه وسله وال وژل سوي دي.
جنوبي وزیرستان تر ۲۰۱۴م کاله پوري د القاعدې، د افغاني طالبانو د حقاني شبکې او پاکستان د اسلامپالو مرکزي اډه وه. خو له ۲۰۱۴م کال راهیسي هغوی د نظامي عملیاتو په ترڅ کي شړل سوي دي. په دا وروستیو کي پاکستاني طالبانو خپل بریدونه شدید کړي دي. په ظاهر کي هغوی د افغانستان د طالبانو له پرمختگ څخه الهام اخیستی دی.
GP/NZ/AG