المان: د پناه غوښتونکو مرکز کې اور لګېدنې ۱۶ تنه ټپیان کړي
۱۴۰۳ آذر ۴, یکشنبه
د شنبې (د نومبر میاشتې ۲۳ نیټه) په ورځ د المان په فوګلزنګ ښار کې د پناه غوښتونکو په یوه مرکز کې اور لګېدنه رامنځته شوې ده چې په پایله کې یې ۱۶ تنه ټپيان شوي دي.
د سیمې یو ۳۵ کلن اوسیدونکی چې شک کیږي د پناه غوښتونکو مرکز ته به یې اور اچولی وي، د پولیسو له خوا په موقت ډول نیول شوی دی. د اور لګېدنې اصلي علت تر اوسه پورې روښانه نه دی. د المان پولیسو یو ځانګړی کمیسیون رامنځته کړی، څو په دې هکله پلټنې وکړي.
په دې پيښه کې ۱۰ تنه ټپیان روغتون ته انتقال شوي او ۶ تنه نور بیا په سطحي ډول ټپیان شوي ول.
اوسمهال د المان د نورد-راین- وستفالن ایالت د فوګلزنګ د پناه غوښتونکو په مرکز کې شاو خوا ۳۸۰ تنه پناه غوښتونکي اوسیږي. د دې ساختمان په هغه پوړ کې چې اور لګېدنه رامنځته شوې ده ۱۸ تنه اوسېدل. د ترلاسه شویو معلوماتو له مخې په ودانۍ کې ټول موجود کسان په سم وخت امن ځای ته انتقال شوي دي.
آژانسونه: ش.ن/ خ.ح