په ترکیې او یونان کي ویجاړوونکې اورلگیدنه ادامه لري

په یونان کي د اورلگیدنو په دوام، له درو ورځو راهیسي د پلازمیني آتن هوا په لوگيو او ایرو ککړه سوې ده. چارواکو د دغه څو میلیوني ښار له اوسیدونکو څخه غوښتي چي خپلي کړکۍ تړلي پریږدي او له کور څخه ونه وځي. د تیري شپې په اوږدو کي د آتن شمال د اور په لمبو کي سوځیده.

د آتن د ښاروال مرستیال واسیلیس کوکالیس نن شنبه په دولتي تلویزیون کي وویل: »که نن د دغه اور په راگرځولو بریالي نه سو، نو له سختي ستونزي سره به مخامخ سو«. تر اوسه پوري د باد بهیر د نوموړي اورلگیدني لمن لا پسي پراخوي. خو اوس ویل کیږي چي تیره شپه او نن سهار دغه باد یو څه راکم سوی او دا کار به د یونان په شمال کي د اورلگیدنې مهارولو ته زمینه برابروي.

په سږني دوبي کي ډیره وچه او گرمه هوا د اروپا په جنوب کي ددغو اورلگیدنو اصلي دلیل شمیرل کیږي. په عین حال کي گومان کیږي چي ځینو سیمو ته په قصدي ډول اور اچول سوی وي. په دې ترڅ کي کوکالیس ویلي چي درې تنه د ځنگلونو د قصدي اوراچوني په تور نیول سوي دي.

د یونان په دوهم لوی ټاپو ائوبویا او همدارنگه د پیلوپونس په ټاپووزمه کي د المپیا او سپارتا تاریخي ځایونو ته نیژدې هم پراخي اورلگیدني ادامه لري.

له اوکراین ، رومانیا او قبرس څخه ژغورونکې عمله په یونان کي د اورلگیدنو د مهارولو په برخه کي مرسته کوي. همدارنگه فرانسې، سویس، سویدن او کروشیا هم د اوروژني هلیکوپترونه او الوتکي په اختیار کي ورکړي دي.

په ترکیه کي هم له یوولسو پرله پسي ورځو راهیسي اورلگیدنه په خپل ټول قوت سره ادامه لري. په دغه اورلگیدنه کي تر ټولو زیات د انتالیا، مرماریس، بودروم او میلاس سیمي زیانمني سوي دي. په میلاس کي د اور لمبې د اوسیدو هغو څو ځایونو ته رسیدلي چی مخکې تخلیه سوي ول.

ډیریو کسانو د دغه ناورین له امله خپل ټول هست ونیست له لاسه ورکړي دي. د زیتون د باغونو او ځنگلونو پراخي سیمي په بشپړ ډول سوځیدلي دي. تر اوسه پوري په ترکیه کي ددغي اورلگیدني له امله د اتو کسانو وژل کیدل تأيید سوي دي.

(dpa) / gp/ns