میلر: د اخراج پروسه د مخه پیل شوې ده 

له کابل څخه د آلمان خبري آژانس ليکي چې په افغانستان کې د نړیوالو ځواکونو قوماندان، جنرال سکاټ ميلر، په کابل کې خبريالانو سره په خبرو کې وويل چې د اخراج پروسه لا د مخه پیل شوې ده. هغه وویل دغه پروسه د امریکا متحده ايالاتو د ولسمشر جو بايدن له هغه اعلان سره سم پيل شوې چې ويې ويل د سپتمبر میاشتې تر ۱۱مې به ټول ځواکونه له افغانستان څخه ووځي.

میلر وويل: «په حاضر وخت کې زموږ ټول ځواکونه د بيرته ستنیدو له پاره د خپل چمتووالي په حال کې دي، د اطلاعتو ورکولو رسمي نيټه د می میاشتې لومړۍ ده خو په عین وخت کې موږ خپل محلي اقدامات تر دې وړاندې پیل کړي دي.»

جنرال میلر زیاته کړه چې له افغانستان څخه د اخراج بهیر به په يو منظم شکل سره ترسره شي، په دې معنی چې د دوی ټولې پوځې اډې او تجهيزات به افغان امنيتي ځواکونو ته سپارل کيږي.

دا په داسې حال کې ده چې افغان حکومت اوس مهال عملا طالبانو سره په جګړه بوخت دی، سربيره پر دې چې د دغې ډلې او حکومت تر منځ د سولې مذاکرات هم پيل شوي دي.

خو طالبانو تیره اوونۍ وويل چې تر هغه وخته پورې چې له افغانستان څخه ټول خارجي ځواکونه نه وي وتلي، دوی به نور د سولې په هیڅ کنفرانس کې ګډون ونه کړي.

په عین وخت کې د طالبانو پر ضد د حکومت پوځي اقدامات هم ادامه لري، خو دغه اقدامات کله کله د ملکیانو د ژوند په بیه تماميږي.

افغان چارواکي وايي چې لږ تر لږه اته تنه ملکیان د میدان وردک ولایت مرکز کې د افغان ځواکونو په هوايي حمله او د هاوان ګوليو په برید کې وژل شوي دي. زیاته شوې چې د جلریز په ولسوالۍ کې د هوايي حملې په نتيجه کې د یوې کورنۍ څلور غړی وژل شوي دي.

په عین حال کې ځينې وخت د سړک غاړې ماينونو په چاودنو کې هم ملکیانو ته درانه تلفات اوښتي دي. همدا تيره ورځ هم په غزني ولایت کې څلور ملکیان د سړک غاړې ماین په يوه چاودنه کې ووژل شول. ځایي چارواکو وویل چې دغه ماین طالبانو ايښی وو. په ورستیو کې د پلازمينې کابل په ګډون، د افغانستان په ځينو ولایتونو کې د هدفي وژنو او چسپکي ماینونو د چاودنو پيښې هم ډيرې شوې دي. د اکثرو دغو پيښو مسئوليت هم کومه ډله په غاړه نه اخلي، خو افغان حکومت يې پړه پر طالبانو اچوي.

 په افغانستان کې د ملګرو ملتونو سازمان د مرستندويه ماموریت په حواله، په دغه هیواد کې د روان کال په لومړيو درو مياشتو کې ۵۷۳ تنه ملکيان وژل شوي او ۱۲۱۰ تنه نور ټپیان شوي دي. د دغې ادارې په خبره دا د تيرکال د همدې مودې په پرتله په تلفاتو کې ۲۹ سلنه ډيروالی ښيي.

يو شمیر افغانان اندیښمن دي چې د خارجي قواوو په وتلو سره به د افغانستان وضعیت تر دې لا پسې خراب شي.

ډي پې اې/م.ک.ص./م.ن.ص.