پاکستان: په بنو کې له يوې پوستې ۷ عسکر تښتول شوي

د پاکستان د استخباراتو ادارې يوه چارواکي د نوم نه ښودلو په شرط وويل چې یوه حمله د دوشنبې په ورځ (د نومبر ۱۸مه) د خیبر پښتونخوا ایالت په تيرا علاقه کې شوې چې په کې «۸ سرتيري» او «۹ وسلوال یاغیان» وژل شوي دي. د دغې حملې مسئولیت پاکستاني طالبانو (TTP) منلی دی.

پولیس برمته شوي

په خیبر پښتونخوا ایالت کې د پولیسو یوه لوړرتبه افسر چې هغه هم ونه غوښتل نوم ېې وښيي، وویل چې وسله والو د پولیسو يوه پوسته محاصره کړې وه او ۷ پولیس ېې برمته کړي دي. دا پېښه د بنو په سيمه کې د عثمان زيو د پوليسو د مرکز په ساحه کې رامنځته شوې ده.

د پوليسو يوه سيمه ایز چارواکي د پاکستان ډان رسنۍ ته وويل چې »وسله والو پوسته کلابنده کړه او په زور هلته ورننوتل او  په هلته موجود د پوليسو کارکوونکي یې د يرغمل کړل.«

د پولیسو دغه افسر زیاته کړه چې «وسله والو د پولیسو اړوند وسلې هم له ځانه سره وړي دي.» د محمد ضیاالدین په نوم د پولیسو یو بل افسر هم دغه پېښه تائيد کړه.

ضياالدين وويل چې په سيمه کې د لټون چارې پيل شوي دي او د يرغمل شويو د موندلو په موخه سيمه کلابنده شوې ده.

په پاکستان کې د پاکستاني طالبانو حملې ډېرې شوي دي. دغې ډلې د اکتوبر په ۲۵مه یوې حمله کې ۱۰ پولیس ووژل.

د پاکستاني طالبانو علاوه، بيلتون غوښتونکې ډلې هم د پاکستان په مختلفو علاقو کې پر امنیتی ځواکونو وسله والې حملې ترسره کوي.  

د شنبې په ورځ د پاکستان په بلوچستان ایالت کې د یوې بيلتون غوښتونکې ډلې په حمله کې ۷ پاکستاني عسکر ووژل شول. دغه حمله د بلوچستان ایالت په مرکز کې د اورګاډو په یو تمځای کې تر يو ځانمرګي بريد یوه اوونۍ وروسته وشوه. په یاد ځانمرګي برید کې د ۱۴ عسکرو په ګډون ۲۶ کسان وژل شوي ول.

(AFP)mks/bs