Џафери: Страстите во Струга мора да се смират

Изјавата вицепремиерот за спроведување на Рамковниот договор Муса Џафери ја даде по средбата во Владата со албанскиот амбасадор во Македонија Арбен Чејку, во одговор на новинарско прашање.

„По анализата на настаните ќе се преземат сите неопходни мерки за организаторите. Не можам однапред да прејудицирам кој ќе биде обвинет. Целта е да се смират страстите и состојбата да се нормализира, онака како што очекуваат граѓаните од претставниците на централната и на локалната власт“, нагласи Џафери.

Сите настани, посочи, треба да се канализираат до институциите кои се надлежни.

„Како јавен функционер нема да си дозволам политички да ги осудувам ниту едните, ниту, пак, другите пред да ги истражиме сите настани, бидејќи може да направиме двојна грешка и дополнително да ги иритираме страните. За жал неочекувано и во 2012-та година кај нас се‘ уште се случуваат провокативни настани кои емоционално ги провоцираат граѓаните независно од која страна и да се“, рече вицепрмеиерот Џафери.

ИВЗ: Во земјата се подгрева исламофобија

Исламската верска заедница (ИВЗ) претходно реагираше на, како што велат, понижувањето на исламската вера на Вевчанскиот карневал, како и исмејувањето на коранот.

„Загрижени сме за жал, што последниве денови во Македонија, исламофобијата често пати е комбинирана со владина пропаганда, како што е случајот со Вевчанскиот карневал, каде што владата на Македонија секоја година за фестивалот доделува 50 илјади евра од парите на сите граѓани, вклучувајќи ги и парите на муслиманите. Уште повеќе состојбата се усложнува со учество на високи владини функционери, како што е министерката за култура, пратениците од позицијата и опозицијата и претседателот на општина Вевчани“ се вели во писмената реакција на ИВЗ.

ИВЗ бара да биде поднесена кривична пријава против сите кои ги повредиле

чувствата на муслиманите.

„Во спротивно ќе сметаме дека и државниот врв е поддржувач на ваквото организирано однесување“ велат од ИВЗ.

Според нив, државното раководство го премолчило и омаловажувањата на

Албанците и Турците во Ниш и Белград, на Европското првенство во ракомет во 2012-та година.

„Културниот фанатизам било од која страна да доаѓа, а кој излегува надвор од споменатите норми на добронамерно однесување, придонесува за продлабочување на омразата меѓу граѓаните“ се вели во реакцијата.

Од ИВЗ ги повикуваат своите верници да се однесуваат воздржано.

Автор: ЖА/БГ/миа/макфакс

Редактор: Борис Георгиевски