Шалке во невозможна мисија во Мадрид

Фудбалерите на Шалке немаат што да загубат на реванш-дуелот против Реал во Мадрид. Во Гелзенкирхен никој и не помислува дека може да се надокнади разликата од првиот меч- 1:6, но надежите се дека со пожртвувана игра може да се извлече барем пристојно простување од годинешното издание на Лигата на Шампионите. Дотолку повеќе што Реал веќе за викендот го очекува големото шпанско дерби против вечниот ривал Барселона, па тренерот Карло Анчелоти веќе најави дека ќе одмара неколку првотимци.

Понеизвесно се очекува да биде на „Стемфорд Бриџ“ во Лондон на натпреварот меѓу англискиот претставник Челзи и турскиот Галатасарај. Првиот дуел одигран во Истанбул заврши без победник 1:1. Дополнителен „шмек“ на дуелот му даваат личниот судир меѓу тренерите на двата тима, Жозе Мурињо и Роберто Манчини, како и фактот дека легендата на Челзи, Дидие Дрогба за првпат ќе настапи против својот некогашен тим на стадионот во Лондон.

Пласман меѓу осумте најдобри веќе обезбедија Бајерн Минхен, Барселона, Атлетико Мадрид и Пари Сен Жермен. Последните четвртфиналисти во елитното натпреварување ќе бидат познати утревечер по завршувањето на средбите Манчестер Јунајтед - Олимпијакос (0:2 прв натпревар) и Борусија Дортмунд - Зенит (4:2).