Хрватска мора да ги почитува „правилата на играта“

Размената на писма на релација Брисел-Загреб поради спорот околу европскиот налог за апсење продолжи и вчера (04.09.2013), кога потпретседателката на Европската комисија и комесарка за правосудство, Вивиан Рединг и‘ испрати уште едно писмо на хрватската влада:„ Испратив ново писмо со кое порачав-очекувам јасен одговор и брза промена на законот“, изјави Рединг за Дојче веле.

Во ЕК истовремено потврдуваат дека „контактите со хрватските власти се во тек“.

„Минатата недела примивме повеќе уверувања, меѓу другото и на претседателско ниво, за намерите на Хрватска“, изјави портпаролката на претседателот на ЕК, Пија Аренхилде Хансен.

И додека во Европската комисија велат дека се работи за „конструктивен пристап“, односно за искажана подготвеност на Загреб за промена на спорниот закон и негово ускладување со европското законодавство, комесарката Рединг очекува конкретно објаснување на хрватските намери и нивно итно спроведување во пракса.

Што подразбира „заедничкиот европски правен простор“?

По повод едностраната одлука на Хрватска, непосредно пред пристапувањето кон ЕУ, да воведе клаузула според која хрватските граѓани не можат да бидат израчени на земјите членки на ЕУ кои ги бараат за злосторства извршени на нивна територија пред 2002 година, од Брисел стигнаа остри реакции и дури закани со санкции. ЕК инсистира на усогласување на тој закон со европското законодавство, според кое сите осомничени хрватски граѓани, без оглед на времето кога го извршиле злосторството, можат да бидат израчени на земјите-членки кои ги бараат.

За важноста на усогласувањето на националните законодавства со она на европско ниво, заради функционалност на целата ЕУ, Рединг зборуваше на предавањето „ЕУ и владеењето на правото“ во Центарот за европски политички студии во Брисел:

„Европскиот налог за апсење против осомничените кривични извршители, издаден во Германија или Франција, мора да биде спроведен и во Финска и во Хрватска, дури и ако се однесува на граѓани на тие држави. Тоа се правилата на играта во ЕУ“, експлицитна е Рединг, напоменувајќи дека европскиот заеднички простор во областите на слободата, безбедноста и правдата не е секаде сфатен во целост.

Санкциите се „готват“

Во ЕК засега е одложена расправата за непочитувањето на Европскиот налог за апсење од страна на Хрватска. Во Брисел очекуваат дека Загреб искажаната политичка волја ќе ја преточи во конкретни чекори и ќе престане со кршење на европското законодавство. Во спротивно, дипломатски извори зборуваат за „подготовка на соодветни санкции“, кои се во согласност со членот 39 од Договорот за пристапување на Хрватска кон ЕУ, а кои најверојатно би се однесувале на скратувањето на европските фондови наменети за хрватското правосудство.