Хрватите се радуваат, но скепса има и натаму

Кинезите што живеат во Хрватска во текот на викендот со огномет ја поздравија новата година - денеска почнува „Годината на змејот“ и тоа овојпат е знак на надеж за многумина Хрвати. Ова е историски ден:

„Се радувам што цела Европа ќе ми биде татковина. Се разбира, Хрватска останува мојот прв дом, но во рамки на Европа. Тоа значи дека можам да ги уживам сите права на еден Европеец како рамноправен граѓанин на развиена Европа“, изјави хрватскиот претседател Иво Јосиповиќ.

Со своето „да“ Хрватите врзуваат пред се’ економски надежи, зашто веќе три години земјата се наоѓа во рецесија.

„Не можеме да се споредуваме со земји како Швајцарија и да мислиме дека се’ ќе постигнеме сами. Напротив, со ЕУ имаме многу подобри можности што се однесува до работните места и се’ друго“, вели една жена од Загреб, а друга нејзина сограѓанка е на мислење: „Мислам дека немаме друг избор. Како и да е... Не знам... Се’ уште сме скептични, точно е.“

Критичарите на Европа во Хрватска стравуваат од загуба на националниот идентитет и суверенитет. Тие укажуваат на должничката криза и не гледаат како Брисел во овие тешки времиња би можел да и’ помогне на земјата.

Прилогот можете да го погледнете и како Видео на денот!

Автор: Франк Браун / Елизабета Милошевска Фиданоска

Редактор: Александра Трајковска