Укината забраната на Твитер во Турција

Владин претставник соопшти дека е земена во предвид пресудата на Уставниот суд и е укината забраната на Твитер. Турската Дирекција за комуникации денеска (03.04.2014) донесе одлука за укинување на забраната за пристап до социјалната мрежа Твитер, откако вчера Уставниот суд на Турција побара нејзино укинување со оценка дека со неа се прекршува правото на изразување.

Турција на 21 март го блокира пристапот до Твитер, откако на социјалната мрежа беа објавени наводни снимки на телефонски разговори меѓу премиерот Реџеп Таип Ердоган и неговите соработници во врска со корупцискиот скандал што ја потресе земјата и во кој беа инволвирани лица блиски до Владата.

„Твитер и таквите работи ќе ги искорениме“, беше изјавата на Ердоган во март. Во многу западни држави неговата одлука предизвика жестоки критики.