Тоше Проески се избори за пласман во финалето на Песната на Евровизија

Тоше Проески успеа да ја внесе Македонија во финалето на Евросонг, Балканот покажа дека не мора да асоцира само на грди работи како војни и убиства, криминал со дроги и трговија со бело робје, туку и на благородните – како песната. Меѓу 10-те песни, што публиката во Европа со телефонско гласање синоќа ги одбра од 22-те претставени во квалификациите, шест се од земји на Балканскиот полуостров – покрај Македонија, уште и Србија и Црна Гора, Босна и Херцеговина, Хрватска, Албанија и Грција. Освен тоа, домаќинот Турција, минатогодишен победник, и Романија како една од 10-те првопласирани земји од ланскиот фестивал, се меѓу директните учесници.

В сабота во финалето во Истанбул, значи, ќе се натпреваруваат десетте најдобри земји од минатогодишниот Евросонг, десетте најдобри од квалификациите, како и Велика Британија, Франција, Шпанија и Германија како постојани учеснички на изборот за Песна на Евровизија.