Смртоносен напад врз полициски автобус во Карачи

Во експлозија на автомобил-бомба во Карачи денеска загинаа најмалку 11 полицајци, а 47 лица се ранети.

Бомбата експлодираше во момент кога проаѓал автобус со полицајци кои се враќале од обука. Шефот на полицијата во Карачи, Шахид Хајат рече дека експлозивот најверојатно бил активиран со далечински управувач.

Во автобусот имало околу 50 полицајци припадници на специјалната антитерористичка полиција за брзи дејства.

Ранетите полицајци се префрлени во локалната болница, а 12 од нив се наоѓаат во критична состојба.

Засега никој не ја презеде одговорноста за нападот, што се случи во близина на деловен центар. Пристанишниот град Карачи веќе долго време е центар на етничко, политичко, милитантно и секташко насилство.

Денешниот напад е последен во серијата изведени во момент кога пакистанската Влада се обидува да постигне мировен договор со локалните екстремни талибанци на северозапад од земјата, со кој сака да го прекине насилството во кое во последните неколку години загинаа илјадници луѓе.