Сепаратистите го прифаќаат прекинот на огнот во Украина

Ненадеен пресврт во украинскиот конфликт. Проруските сепаратисти на истокот на земјата се согласија со привремено примирје, најмалку до петок. Водачот на сепаратистите Александер Бородај во Доњецк изјави дека бил подготвен за преговори со Киев.

Претходно во Доњецк, на изненадување претставници на Русија и на Организацијата за безбедност и соработка во Европа (ОБСЕ) се сретнаа со водачите на бунтовниците блиски до Москва. Прекинот на огнот бил резултат од овие преговори, појасни екс-претседателот Леонид Кучма.

Претседателот на Украина Петро Порошенко на крајот на минатата недела прогласи еднострано прекин на огнот. Но, оттогаш борбите меѓу проруските бунтовници и владините трупи продолжија.

Германскиот министер за надворешни работи Франк-Валтер Штајнамајер во Киев ги продолжува разговорите. Тој пред сѐ сака да увиди како ЕУ може да го поддржи мировниот план на Порошенко. Ова е „без сомнение одлучувачка недела за Украина“, смета германскиот министер.