Се шират безредијата и грабежите во Јужна Африка

Бранот насилни протести и пљачкања во Јужноафриканската Република, во кои досега загинаа најмалку 72 лица, се прелева во повеќе региони, како што соопшти полицијата синоќа.

Претседателот Сирил Рамафоза го нарече насилството едно од најлошите во Јужна Африка од 90-тите години на минатиот век, пред крајот на апартхејдот. Подменати се пожари, блокирани се автопатишта, и ограбени се деловни објекти и магацини во поголемите и помалите градови во провинциите Квазулу-Натал и Гаутенг

Во кризните области според медиумите се организираат граѓански стражи, за да спречат префрлување на насилствата од ограбените и често целосно демолирани индустриски зони во станбените квартови.

Во меѓувреме мобилизираната војска која треба да ѝ помогне на полицијата, според владини наводи е распоредена првенствено на стратешки пунктови околу болниците и аеродромите, но е стационирана и во близина на Јоханесбург. 

Ситуацијата се заострува поради кризата со коронавирусот – многу центри за вакцинација се затворени поради безредијата. Освен тоа, се закануваат тесни грла во снабдувањето, зашто со денови е затворена една од најважните сообраќајни поврзници од најважното пристаниште во Африка – Дурбан, кон Јоханесбург.

Проценетите штети за ионака заслабнатата економија во земјата во меѓувреме се искачија на повеќецифрени милионски суми.

-повеќе:

Јужна Африка: што наследува Рамафоза по заминување на Зума?

„Национална катастрофа“ во Јужна Африка- Кејп Таун останува без вода

Безредијата започнаа како еден вид протести против затворањето на поранешниот претседател Џејкоб Зума, но во рок од неколку дена прераснаа во судири и грабежи во индустриското срце на земјата околу Јоханесбург, како и во родната провинција на Зума, Квазулу-Натал.

Зума беше осуден на затворска казна од 15 месеци поради непочитување на судот, на чие издржување се упати во средата вечерта. Тој беше повикан на испрашување пред истражна комисија поради обвинувања за корупција во време на неговиот мандат (2009-2018 година), но не се одзва на поканата.