Нов договор помеѓу Тунис и Германија

Претседателот Бежи Каид Есебси изјави дека со договорот за справување со нелегалната имиграција, потпишан денеска во Тунис, ќе бидат задоволни и Тунис и Германија. Потпишувањето на договорот ѝ овозможува на Германија побрзо да ги депортира граѓаните на Тунис чии барања за азил се одбиени.

Договорот ги обврзува туниските власти, во рок од 30 дена, да ги решат сите прашања и проблеми поврзани со идентитетот и документите на Тунижаните на кои германските власти им ги одбиле барањата за азил. По завршувањето на тие процедури, документите неопходни за депортација ќе бидат издавани во рок од една недела.

„Ова се добри вести за нас“, изјави канцеларката Меркел по објавувањето на информациите за договорот.

Потпишувањето на договорот се случува во време на влошени односи помеѓу двете земји, откако Тунижанецот Анис Амри, на 19 декември 2016 година изврши терористички напад на божиќен пазар во Берлин, во кој загинаа 12 лица. Претходно, Анис Амри бил задржан од германските власти, но тие не биле во можност да го депортираат во Тунис затоа што тамошните власти не му издавале документи за идентификација.

Поголема поддршка од Германија

На прес-конференција во Тунис, канцеларката Меркел изјави дека со договорената рамка за помош на Тунис, Германија ќе обезбеди 250 милиони евра - пари кои ќе бидат искористени за промовирање на развојни проекти, креирање на работни места и поддршка за малите бизниси.

Посетата на Меркел на Тунис е дел од дводневната посета на северноамериканските земји чија цел е зајакнување на соработката со регионот за прашања од областа на имиграцијата и регионалната безбедност.